Жыл санап Талдықорған қаласында жолдарға жөндеу жұмыстары қарқын алуда. Осыған байланысты өткен жылы қолға алынған аймақтағы «Көктал» тұрғын үй алабының 37 көшесіндегі жол құрылысы 2026 жылы толық аяқталмақ.
Сала мамандарының сөзінше, облыс орталығына қарасты Еркін ауылы «Көктал» шағын аумағындағы көше жолдарын жөндеу ісі 2024 жылы басталған болатын. Халықтың сұранысына сай Талдықорған қаласы әкімінің тапсырмасы бойынша қолға алынған жұмыстар келер жылы аяқталады. Жоспар бойынша ондағы 37 көшені жөндеу үшін жалпы 3,3 млрд теңге қаражат бөлініп, 22,6 шақырым жолды ретке келтіру көзделген. Соның ішінде биылғы жылы 7,6 шақырым болатын 8 көшені жөндеуге 974,7 млн теңге қарастырылып, қазірге 2 көшенің асфальт төсемі толығымен аяқталса, қалған 6 көшеге асфальт төсеу жұмыстарын жыл соңына дейін аяқтау көзделген. Сонымен қатар, биылғы жылы Еркін ауылы және 3-ші бөлімше бойынша көше жолдарына ағымдағы жөндеу жұмыстарын да жалғастыру жоспарда.
– Өткен жылы «Халық қатысатын бюджет» бағдарламасы аясында Көктал тұрғын үй алабының Амангелді көшесіне ұзындығы 1,8 шақырым болатын жаяу жүргіншілер жолы салынып, қолданысқа берілді. Аталған бағдарлама бойынша осыған дейін Еркін ауылындағы Момышұлы, Көктал тұрғын үй алабындағы Теректі және 3-бөлімшедегі Шұғыла көшелерінде балалар алаңы ел игілігіліне берілген еді. Осы барыста тағы Еркін ауылының Теміртекұлы және Көктал тұрғын алабындағы Ойтоған көшелерінде көптің бұқаралық спортпен шұғылдануына арналған воркаут алаңдары салынып, қазір бұл нысандар жұмыс істеп тұр. Сонымен қатар биыл Еркін ауылында 120 орынды мәдениет үйінің құрылысы басталады,– дейді жауаптылар.
Қалалық жолаушылар көлігі және автомобиль жолдары бөлімінің мәліметінше, биылғы жылы шаһарда 70 шақырымнан аса жол жөнделмек. Атап айтқанда, аймақтағы жаңадан бой түзеп келе жатқан Құлагер, Бірлік, Жастар-1 шағын аудандары мен Солтүстік-Батыс тұрғын үй алабындағы 107 жаңа көшенің 54 шақырымға жуық жолына құрылыс жұмыстары жүргізілмек. Сонымен қатар, 21 шақырымнан астам жол күрделі жөндеуден өткізіліп, орташа жөндеу бойынша 27,9 шақырым болатын 28 көшенің жол жамылғысын ауыстыру ісі қолға алынып, 17 шақырымнан астам жол ағымды жөндеуден өткізілмек. Сонымен қатар, өңір тұрғындарының өтініштеріне сай, көшелердегі жол төсемін қалпына келтіру, шұңқырларды тегістеу де басты назарда. Биыл өткен жылмен салыстырғанда жаңа жол салу, күрделі және ағымды жөндеу жұмыстарының көлемі екі есеге жоғары. Жол құрылысы бойынша қолға алынған жобалар 2027 жылы толық аяқталып, қала ішіндегі 100 шақырымнан астам жол жөнделмек.
Айдын КӘЛІМХАН
