Жыл санап Талдықорған қаласының кеңейуіне байланыста орталықтандырылған сумен жабдықтау жұмыстары қарқынды. Атқарылған жұмыстардың нәтижесінде бүгінде аймақтағы су құбырын жеткізу көрсеткіші 98 пайызға жеткен.
Сала мамандарының сөзінше, қазір Жетісу облысының орталығында 600 шақырымнан астам су құбыры бар. 2023 жылы 2 жоба қолға алынып, 42,8 шақырым жерге су құбырын тарту жұмыстары басталған болатын. Өткен жылдың желтоқсан айында Қызылтас саяжайы таза ауыз сумен қамтылса, енді жыл соңына дейін Қаратал саяжайына су беріле бастайды деп жоспарлануда. Сонымен қатар қазір аймақтағы «Жастар 1/1» тұрғын үй алабында сумен жабдықтау және кәріз желілерін салу жұмыстары толық аяқталған.
– Ал биылғы жылы шаһар басшысының тапсырмасына сәйкес, қалада су жүйелерін жүргізу ісі қолға алынбақ. Сондай-ақ, өңірдегі Еркін ауылы мен 1-ші бөлімшелерге орталықтандырылған су желісін тарту сынды тағы 3 жоба бар. Аталған жоба аясында 1-ші бөлімшедегі 1700-ден астам тұрғын таза ауыз сумен қамтылмақ. Сонымен бірге қала бойынша сыртқы сумен жабдықтау және су бұру желілерін салу және реконструкциялау жұмыстары да жалғасатын болады,– дейді жауаптылар.
Айдын КӘЛІМХАН
