Бүгінде Талдықорған қаласында аулаларды абаттандыру жұмыстары қарқынды. Атап айтсақ, соңғы 10 жылда қаладағы 300-ге жуық көпқабатты тұрғын үйлердің 200-ден астам ауласы жаңартылған. Бұл жұмыстар биыл да жалғасын тауып тағы 60 аула ел игілігіне берілмек.
– Жасырары жоқ соңғы жылдары Жетісу облысының орталығы адам танымастай өзгерді. Өйткені, жыл сайын қалада көптеген тұрғын үйлер мен әлеуметтік нысандар бой көтеріп, жолдар салынып, аулалары жаңартылуда. Бұл біріншіден, шаһар көркіне көрік қосса, екіншіден, өңір дамуының айқын айғағы,– дейді аймақ тұрғындары.
Талдықорған қаласы әкімдігінің мәліметінше, қазір шаһарда аулаларды абаттандыру мен күрделі жөндеу жұмыстары кезең-кезеңімен қолға алынуда. Мәселен, өткен жылы қаладағы «Ұлан» шағын аумағында 5 аула ретке келтірілсе, Еркін ауылында 2 аула жөндеуден өткізілген. Сонымен қатар, «Халық қатысатын бюджет» бағдарламасы аясында Батыс тұрғын алабындағы Жазиралы мен Ақындар көшелерінің қиылысында, сондай-ақ Ащыбұлақ, Алмалы, Үйтас және Көктем саяжайларында стрит-воркаут кешені мен балалар ойын алаңдары салынған.
– Аулалар құрылысы тағы жалғаспақ. Осыған байланысты, биыл облыс орталығындағы «Жұлдыз», «Ұлан», «Жетісу» шағын аудандарында 39 ауланы жаңарту жоспарда. Бүгінде құрылыс жүргізуші мердігер мекемелерді анықтау бойынша мемлекеттік сатып алу порталында конкурс ұйымдастырылуда. Сонымен қатар «Халық қатысатын бюджет» бағдарламасы аясында 20 аулаға қарапайым спорттық жаттығу кешені және балалар ойын алаңы салынбақ,– деді қалалық тұрғын үй-коммуналдық шаруашылық бөлімінің жауаптылары.
Айдын КӘЛІМХАН
