Сарқан ауданына қарасты Қарабөгет ауылының тұрғыны Гүлнұр Солтан ұлттық қолөнерді жаңғыртып, оны кәсіпке айналдырған іскер жан.
Қытай Халық Республикасында 1978 жылы дүниеге келген қандасымыз 2008 жылы отбасымен Қарабөгет ауылына көшіп келген. Ол бүгінде Сарқан аудандық іскер әйелдер кеңесінің мүшесі ретінде өңірде ұлттық қолөнердің дамуына үлес қосуда.
– Анам өте ісмер адам болатын. Текемет басып, алаша тоқығанын көріп өстім. Сол өнер маған бейсаналы түрде дарыды. Қазір көпшілік қой жүнінің қадірін біле бермейді. Ешкімге қажетсіз болып, шашылып жатқан жүндерді көргенде анамның еңбегі көз алдыма келді. Содан сол жүндерді жинап, жуып, тазалап, сабап, түтіп, дайын күйге келтірдім. Анамнан үйренген көрпе, қыз жасауы сияқты бұйымдарды жасай бастадым. Байлығымызды қор қылмайын деп бастаған ісім бүгінде кәсібіме айналды, – дейді Гүлнұр ханым.
Кәсіппен айналысамын деген жанға мүмкіндік мол. Жүннен жасалған бұйымдар үйдің сәнін арттырса, тоқылған киімдер суық өткізбейді. Шебердің айтуынша, тапсырыс бойынша байпақ, қолғап, шәркей, балалар киімі, құрақ көрпелер де дайындайды.
– Қой жүнінің адам денсаулығына пайдасы зор. Одан жасалған бұйымдар сәнді әрі берік келеді. Бала күнімізде әжелеріміз жүн түтіп, сабап, киіз басатын. Қазір ұршық иіріп, шұлық тоқитын апалар да сиреп кетті. Ал негізінде қой жүнінен жасалған бұйымдар оңай жыртылмайды, жылуды жақсы сақтайды, – дейді қолөнер шебері.
Кейіпкеріміздің алдағы мақсаты – кәсібін одан әрі дамытып, ұлттық өнерді жалғастыратын шәкірт тәрбиелеу.
Жақсылық ЖОМАРТҰЛЫ
Сарқан ауданы
