Санаулы күндерден кейін Италияның Милан және Кортина–д’Ампеццо қалаларында XXV қысқы Олимпия ойындарының алауы тұтанады. Төрт жылдықтың басты додасына әлемнің 93 елінен 3 500-ден астам таңдаулы спортшы қатысады, – деп хабарлайды 7-su.kz ақпараттық порталы.
Қазақстан Тәуелсіз мемлекет ретінде биылғы ақ алау бәйгесіне тоғызыншы мәрте қатысқалы отыр. Ұлттық құрама сапында Италия айдындары мен беткейлерінде ел намысын 36 спортшы қорғайды. Айта кетерлігі, гендерлік теңдік толық сақталып, құрама сапына 18 ер және 18 әйел спортшы енді. Бұл өткен Бейжің Олимпиадасымен салыстырғанда (34 спортшы) құрамның сапалық әрі сандық тұрғыдан өскенін көрсетеді.
Қай өңірден қанша спортшы қатысады?
Дәстүрлі түрде елімізде қысқы спорт түрлері солтүстік және шығыс аймақтарда жақсы дамыған. Алайда биылғы географиялық көрсеткіштер оңтүстік өңірлердің де әлеуеті артып келе жатқанын аңғартады. Өңірлер бойынша көш басында Алматы қаласы мен Ақмола облысы тұр:
-
Алматы қаласы: 4 спорт түрінен 6 спортшы;
-
Ақмола облысы: 2 спорт түрінен 6 спортшы;
-
Шығыс Қазақстан облысы: 1 спорт түрінен 4 спортшы;
-
Шымкент қаласы: 1 спорт түрінен 4 спортшы;
-
Астана қаласы: 3 спорт түрінен 4 спортшы;
-
Алматы облысы: 2 спорт түрінен 4 спортшы.
Сондай-ақ Павлодар облысынан 3, Қостанайдан 2, ал Солтүстік Қазақстан, Қарағанды және Абай облыстарынан бір-бір спортшыдан бақ сынайды.
Олимпиададан не күтеміз?
Қазақстандық спортшылардың Олимпиадаға дайындығы жоғары деңгейде өткенін атап өткен жөн. Мемлекет тарапынан спорттық инфрақұрылымды жақсарту және жаттығу жиындарын халықаралық стандарттарға сай өткізу бойынша ауқымды жұмыстар атқарылды. Әсіресе, шорт-трек, конькимен жүгіру және фристайл-могул түрлерінен жүлде алу мүмкіндігіміз жоғары деп бағалануда.
Олимпиада ойындары 6-22 ақпан аралығында өтеді. Бұл дода тек спорттық бәсеке ғана емес, сонымен қатар еліміздің халықаралық аренадағы имиджін нығайтудың маңызды құралы. Барша қазақстандықтарды ұлттық құрамаға қолдау көрсетіп, жеңісті сәттерді бірге бөлісуге шақырамыз.
