Медицина ғылымдарының кандидаты, PhD, гепатопанкреатобилиарлық хирург әрі трансплантолог Ерік Нұрланбаев Талдықорған қалалық көпбейінді ауруханасында жұмысын бастады.
Жиырма жылдан астам тәжірибесі бар, 10 мыңнан аса күрделі ота жасаған дәрігер бұған дейін республикалық А. Сызғанов атындағы Ұлттық ғылыми хирургия орталығында қызмет еткен. Тәжірибелі мамандардан үлгі алып, шыңдалып, бесаспап маманға айналды. Бұл күні ол өзінің пациенті, бауыр трансплантациясын жасаған Әйгерім Бегалы жайлы айтты. Емделушіге донордың бауырын жалғаған. «Әйгерімнің жағдайы айрықша. Ағзасы басқаның бауырын қабылдап, табиғи жолмен нәресте сүйді. Бүгінде белсенді өмір сүріп, ұнайтын кәсібімен толыққанды айналысуда», – дейді дәрігер.
Иә, Әйгерім біздің әріптесіміз. Ақжарқын, өмірге құштар, қос ұлдың анасы, еңбекқор жан.
Ерік Құмарбекұлы бүгінде ұйқыбезі хирургиясымен де айналысады. «Біздің жұмыс – ота жасауға атсалысатын барлық маманның біліктілігі мен ептілігіне байланысты. Жұмысымыз – ұжымдық еңбектің жемісі. Мұнда әрбір маманның іскерілігі маңызды. Нәтиже жақсы болу үшін кадр даярлау, командалық жұмыстың ырғағын қалыптастырған дұрыс», – дейді дәрігер.
Ол бүгінде көпсалалы ауруханада жағдайы ауыр науқастарға ота жасап, жас мамандарға тәжірибесін үйретуде. Жуырда өңірде алғаш рет бауыр эхинококкозын пункциялық әдіспен емдейтін ота жасады. Яғни, эхинококк кистасын инемен тесіп емдеді.
Білікті маманның оралуы – өңір медицинасының мүмкіндігін арттырады. Алда бауыртрансплантациясын аталмыш ауруханада жасауға даярлық жұмыстары жалғасуда. Бұл кеселмен бірнеше мыңдаған адамның кезекте тұрғанын ескерсек, емдеу тәсілі жүзеге асса талайдың өмірі сақталатыны сөзсіз.
Гүлжан ТҰРСЫН
