Ақпан айында Қазақстанда бірқатар маңызды өзгерістер күшіне енеді, – деп хабарлайды 7-su.kz ақпараттық порталы.
Рамазан айы басталады
Қасиетті Рамазан айы 19 ақпанда басталып, 19 наурызға дейін жалғасады.
-
Қадір түні – 16-17 наурыз
-
Ораза айт – 20 наурыз
Айта кетейік, Ораза айтта қосымша демалыс берілмейді.
Балаларға Ұлттық қордан ақша түседі
1 ақпанда «Ұлттық қор – балаларға» бағдарламасы аясында әр балаға шамамен 130 доллар аударылады. Үш жыл ішінде жиналған қаражат көлемі 360 доллар (шамамен 181 мың теңге) болады. Бұл қаражат 18 жасқа дейін инвестицияланады, ал кәмелетке толған соң оны баспана немесе білім үшін пайдалануға болады.
Ипотеканы өтеу тәртібі өзгереді
Зейнетақы жинағы есебінен ипотеканы өтеу кезінде енді тек негізгі қарызды жабуға болады. Ал пайыздар мен айыппұлдар қарыз алушының өз қаражаты есебінен төленеді. Өтінім қабылдау 2 наурызға дейін уақытша тоқтатылды.
Мектептер мен балабақшалар тексеріледі
Ақпаннан бастап білім беру ұйымдарына жаңа бақылау тәртібі енгізіледі. Жоспардан тыс тексерулер алдын ала ескертусіз жүргізілуі мүмкін.
Әскери кафедраға өтініш онлайн беріледі
1 ақпан мен 30 қыркүйек аралығында бакалавриат студенттері өтінішті eGov.kz арқылы онлайн жолдай алады.
Өрт қауіпсіздігі талаптары күшейеді
1 ақпаннан бастап нысанды пайдалануға беру үшін оның өрт қауіпсіздігіне сәйкестігі туралы қорытынды алу міндеттеледі.
Азаматтық алу үшін емтихан
3-10 ақпан аралығында Қазақстан азаматтығын алуға үміткерлерге арналған тестке өтінім қабылданады.
Фонограммаға тыйым салынады
4 ақпаннан бастап техникалық жабдықталған концерт залдарында фонограмма пайдалануға тыйым салынады. Айыппұл мөлшері 4 млн теңгеге дейін жетеді.
Салық режимін таңдау қажет
Жеке кәсіпкерлер 1 наурызға дейін салық режимін таңдау туралы хабарлама беруі тиіс.
Жылдық табыс шегі – 600 000 АЕК, салық мөлшерлемесі – 4%.
Шекара мен визалар
-
16-18 ақпан күндері Қытаймен автокөлік өткізу пункттері жабылады
-
Италия визасына өтініш қабылдау 11 ақпанға дейін (Астанада)
Электронды кезек енгізіледі
-
Кеген өткізу пункті – 30 қаңтар
-
Қордай өткізу пункті – 16 ақпан
Кореядан айыппұлсыз қайтуға болады
Заңсыз жүрген қазақстандықтар ақпан айының соңына дейін айыппұлсыз елге орала алады.
Әуе қатынасы
-
7 ақпаннан Бішкекке жаңа рейстер ашылады
-
Астана – Кутаиси рейсі 16 наурызда қайта іске қосылады
Олимпиада өтеді
6-22 ақпан аралығында Италияда XXV қысқы Олимпиада ойындары өтеді. Қазақстан атынан 36 спортшы қатысады.
Каникул және демалыс
-
1-сынып оқушылары – 9-15 ақпан
-
Мемлекеттік мерекелер жоқ
-
5 күндік жұмыс аптасы – 8 күн демалыс
-
6 күндік жұмыс аптасы – 4 күн демалыс
