Облыстық маңызы бар автомобиль жолдарын қысқы күтіп-ұстауға 554,1 миллион теңге бөлінген. Оның 290,0 миллион теңгесі 2025 жылы жұмсалса, 264,1 миллион теңгесі 2026 жылға қарастырылған. Қысқы кезеңде жолдардың жұмысын және қауіпсіздігін қамтамасыз ету үшін 5 мердігер мекеме іске кіріскен,-деп хабарлайды 7-su.kz ақпараттық порталы.
Қысқы маусымға қажетті материалдардың жалпы көлемі 4 900 тонна, жанар-жағар май қоры 205 тонна. Қар тазалау және жолдарды күтіп ұстау жұмыстарына 150 арнайы техника жұмылдырылған. Оның ішінде 25 КДМ, 19 автогрейдер, 53 трактор, 21 погрузчик және 32 өзге арнайы техника бар.
Жетісу облысы бойынша автомобиль жолдарының жалпы ұзындығы – 4 019 шақырым. Оның 1 034 шақырымы республикалық маңызы бар жолдарға тиесілі болса, 2 985 шақырымы жергілікті маңызы бар жол. Соның ішінде облыстық маңызы бар автомобиль жолдарының ұзындығы – 2 758 шақырым.
Бұл жөнінде Бейсен Құранбек атындағы Журналистер үйіне келіп, журналистермен жолыққан Жетісу облысы жолаушы көлігі және автомобиль жолдары басқармасы басшысының орынбасары Айдос Досжановпен «Қазавтожол» ҰК» АҚ Жетісу облыстық филиалы директорының орынбасары Жасұлан Қалтаев мәлімдеді.
Басқарма қар басу және қауіп төнуі мүмкін 157 шақырым жол учаскесін анықтады. Ақсу ауданында Жансүгіров-Арасан бағытындағы 21 шақырым, Алакөл ауданында Қабанбай-Көктұма жолының 16 шақырымы және Жаланашкөл станциясына кіре берістегі 10 шақырым бақылауға алынған. Сарқан ауданында Қойлық-Қарғалы жолының 4 шақырымы қауіпті аймақ саналады. Қысқы кезеңде жол қозғалысы қауіпсіздігін күшейту мақсатында облыстық маңызы бар автомобиль жолдарына 460 дана уақытша жол белгісі орнатылған. Сонымен қатар қысқы күтіп-ұстау жұмыстарына жауапты басқарма және мердігер ұйымдардың инженерлік-техникалық қызметкерлері арнайы бұйрықтармен бекітілген.
Желтоқсанынан бастап облыс аумағында облыстық маңызы бар 2 автомобиль жолында бұрқасын жел мен дауылды боран салдарынан 4 рет қозғалыс шектелді. Бұл ретте жедел шаралар қабылданып, жол қозғалысы қысқа мерзім ішінде қайта қалпына келді. Бұдан бөлек, облыс орталығы мен елді мекендерде қысқы күтіп-ұстау жұмыстарына қосымша 291 техника жұмылдырылған. Облыстық маңызы бар автомобиль жолдарында қыс мезгілінде көлік қозғалысының үздіксіз әрі қауіпсіз қамтамасыз болуы басқарманың басты назарында.
