«Жолаушылар тасымалы» компаниясы пойыздарда 60 жастан асқан жолаушыларға жеңілдік беретін жаңа шарттар енгізілетінін хабарлады.
Енді ел ішінде 60 жастан асқан азаматтарға теміржолмен сапарлауға 25% жеңілдік қарастырылған. Оны пайдалану үшін ұлттық тасымалдаушының барлық пойыздарында жарамды QURMET дисконттық картасын алу керек. Карта купе, плацкарт және отыратын вагондарда билет алуға мүмкіндік береді. Карта құны – 3 мың теңге, жарамдылық мерзімі – сатып алынған күннен бастап 1 жыл.
Жастар үшін де тиімді мүмкіндіктер ұсынатын жаңа «KETTİK33» дисконттық картасы енгізілді. Енді 15 пен 25 жас аралығындағы жолаушылар KETTİK33 дисконттық картасы арқылы купе вагондарындағы жоғарғы орындар мен отыратын вагондарға билеттерді 33% жеңілдікпен рәсімдей алады. Картаның құны – 3 мың теңге, жарамдылық мерзімі – сатып алынған күннен бастап 1 жыл.
Дисконттық карталар иесінің атына рәсімделеді әрі оны үшінші тұлғалар пайдалана алмайды. Картаны тек теміржол вокзалдарындағы «Жолаушылар тасымалы» АҚ билет кассаларынан алуға болады. Рәсімдеу үшін жеке куәлік, ұялы телефон нөмірі және (қалау бойынша) электрондық пошта мекенжайы талап етіледі.
Дисконттық карта бойынша жеңілдіктер билет кассаларында немесе bilet.railways.kz сайты арқылы билет сатып алынған жағдайда ғана қолданылады. Екінші деңгейлі банктердің платформалары арқылы сатып алынған билеттерге жеңілдіктер қарастырылмайды.
Жеңілдіктер жыл сайын белгіленген кезеңде ұсынылады. Алайда мерекелік және каникул уақытында дисконттық карталардың қолданылуы тоқтатылады
• 2026 жылғы 20-29 наурыз аралығы;
• 2026 жылғы 25-30 желтоқсан аралығы;
• маусым-тамыз айлары.
Қосымша ақпаратты 1433 тегін нөмірі арқылы, сондай-ақ «Жолаушылар тасымалы» АҚ-ның ресми Instagram парақшасынан алуға болады.
Дереккөз: Tizgin.kz.
