Жетісу облысында туризмді дамыту аясында дәл қону бойынша парапланеризмнен халықаралық турнир басталды. Аталған жарысқа 6 елден 50-ден астам спортшы қатысуда. Өңірде қысқы кезеңде осындай деңгейдегі жарыс алғаш рет ұйымдастырылып отыр, — деп хабарлайды Жетісу облысы әкімінің баспасөз қызметі.
Жарыс ұйымдастырушыларының мәліметінше, ұшулар жеке форматта өтеді, ал турнир 8 ақпанға дейін жалғасады.
– Қысқы кезеңде біз дәстүрлі түрде жарыстар өткіземіз, алайда халықаралық деңгейде алғаш рет ұйымдастырылып отыр. Бұл форматтағы турнир «Ice game», яғни «Қысқы ойындар» деп аталады. Қатысушылардың барлығы – кәсіби деңгейдегі спортшылар. Олар Біріккен Араб Әмірліктерінен, Малайзиядан, Сириядан, Индонезиядан және Ресейдің әр өңірінен келген. Барлығы – 54 адам. Турнир ережесіне сәйкес, қатысушылар 220 метр биіктікке көтеріліп, төменде орналасқан диаметрі небәрі 22 сантиметр болатын нысанаға дәл қонуы тиіс. Бұл үлкен шеберлікті, жоғары дәлдікті және мол тәжірибені талап етеді. Сондықтан жарыстардың тартысты өтетініне күмән жоқ, – деді ҚР Парапланеризм федерациясының вице-президенті Давид Виршки.
Турнирге қатысушылар да өз пікірлерімен бөлісті. Солардың бірі – Малайзиядан келген қонақ Амин Исмайыл.
– Қазақстанға екінші рет келіп отырмын. Алғашында жарыстар туралы таныстарымнан естідім, ал жазда сәтті қатысу мүмкіндігі туды. Биыл да турнирге қатысып отырмын. Парапланеризм – менің хоббиім, жаныма жақын спорт түрі. Келесі жолы достарымды да бірге алып келгім келеді, – деді ол.
Оған парапланеризммен көп жылдан бері айналысып келе жатқан Біріккен Араб Әмірліктерінің спортшысы да қосылды.
– Ең алдымен, Қазақстанның табиғаты таңғалдырмай қоймайды, мұнда өте көп әсем орындар бар. Сіздің елде жарыс өтетіні туралы білген бойда алғашқылардың бірі болып тіркеліп, Дубайдан қуана келдім. Менімен бірге 8 жерлесім де келді, – деді Абдулла Насыр.
Айта кету керек, турнир аясында «Visit Zhetysu» ақпараттық-туристік орталығы Жетісу облысының туристік әлеуетін таныстыратын көрме ұйымдастырды. Бұл қатысушыларға жарыстан бос уақыттарында өңірдің туристік нысандарын аралауға мүмкіндік береді. Сонымен қатар, қатысушылар үшін Текелі қаласы мен оның маңындағы тарихи орындар мен көрікті жерлерді қамтитын таныстыру туры ұйымдастырылмақ.
Сондай-ақ, 2025 жыл қорытындысы бойынша жүргізілген мониторинг нәтижесінде өңірге келген туристер саны 11%-ға артқан, оның ішінде шетелдік туристер саны 60%-ға өскен. Көрсетілген қызмет көлемі 17%-ға ұлғайып, орналастыру орындарының сыйымдылығы 23 мың төсек-орынға жеткен.
Жетісу облысы әкімінің баспасөз қызметі.
