Қабылданған шаралардың арқасында бизнес субъектілері шамамен 23 млн теңгені үнемдей алды, деп хабарлайды 7-su.kz желілік басылымы kaz.inform.kz сайтына сілтеме жасап.
2023 жылдан бастап «Бизнеске жол» жобасы аясында мемлекеттік органдармен өзара қарым-қатынас кезінде туындайтын әкімшілік кедергілерді жоюда кәсіпкерлерге көмек көрсетіліп жатыр.
Жоба іске қосылғаннан бері 49 мыңнан астам кәсіпкердің құқықтары қорғалып, шамамен 800 мәселе шешілді.
Мәселен, Сыбайлас жемқорлыққа қарсы қызмет ұсынысы бойынша Талдықорған қаласының тұрғындары мен 2,4 мың кәсіпкердің құқықтары қорғалды.
— «Жетісу Су Арнасы» шаруашылық жүргізу құқығындағы мемлекеттік коммуналдық кәсіпорын көрсетілетін қызметтер көлемінің өсуіне қарамастан, заңнама талап еткендей су тарифін төмендетпеген. «Бизнеске жол» жобасы шеңберінде суға негізсіз тарифті төмендетуге қол жеткізілді, бұл жеке тұлғалар мен кәсіпкерлік субъектілеріне де әсер етті (бизнес субъектілері үшін тариф 275,5 теңгеден 251 теңгеге дейін – 1 м3 үшін, жеке тұлғаларға 1 м3 үшін – 70 теңгеден 68 теңгеге дейін төмендетілді), — делінген Антикор хабарламасында.
Қабылданған шаралардың арқасында бизнес субъектілері шамамен 23 млн теңгені үнемдей алды.
Бұдан басқа, Антикор Жетісудың ұсынысы бойынша техникалық шарттарды көзделмеген қызметтермен міндетті түрде келісуге байланысты әкімшілік кедергілер жойылды, бұл бекітілген үлгілік нысандарға қайшы келді.
— Сондай-ақ монополияға қарсы ведомство тарапынан техникалық шарттарды беруден бас тартудың заңдылығына тексеру жүргізілді. Нәтижесінде заңсыз бас тарту тәжірибесін тоқтатып, «Жетісу Су Арнасы» шаруашылық жүргізу құқығындағы мемлекеттік коммуналдық кәсіпорынға 15,5 млн теңге көлемінде айыппұл салынды, — делінген хабарламада.
Қабылданған шаралар әділ тарифтік саясатты қалыптастыруға және жергілікті тұрғындар мен бизнес субъектілері үшін қолайлы жағдайлар жасауға мүмкіндік берді
Фото: Мухтор Холдорбеков/ Kazinform
