Көксу аудандық орталық ауруханасында «клиникалық фармация» бөлімі ашылды. Жаңа құрылым емдеу процесін цифрландыру мен бақылауды қатаңдату арқылы медициналық көмектің сапасы мен қауіпсіздігін арттырады.
Бөлімде төрт фармацевт, бір провизор, екі медицина қызметкері және екі курьер еңбек етеді. Ұжымды С. Асфендияров атындағы Қазақ ұлттық медицина университетінде білім алған, 5 жылдық тәжірибесі бар білікті дәрігер Айжан Секенбайқызы басқарады.
Жаңа бөлім дәрігерлердің барлық тағайындауларын орталықтан бақылай алады. Дәрілік заттар бір жерде сақталып, жүйелі түрде бөлінеді. Бұл дәрі-дәрмектердің жоғалуын, артық немесе тиімсіз қолданылуына жол бермейді.
Бөлім медициналық ақпараттық жүйеде жұмыс істейді. Емдеуші дәрігерлердің тағайындаулары тікелей клиникалық фармакологтың «сақтау қорына» түседі. Ол тәулік бойы рецепттерді «бес алтын қағида» бойынша тексереді. Мұнда: дәріні дұрыс тағайындау, дозаны сырқаттың жағдайына сай қолдану, ем-шараны қауіпсіз жасау, қабылдау жиілігі және емдеу курсының ұзақтығын талапқа сай белгіленеді.
Қазіргі таңда фармация бөлімінің жүйесіне терапия, хирургия, жұқпалы аурулар, босану, балалар бөлімдері және күндізгі стационар қосылған.
Бөлімнің ашылуы салтанатты жағдайда өтті. Шараға облыстық денсаулық сақтау басқармасы басшысының орынбасары Алмагүл Кенжеғұлова қатысып, жобаның маңызын атап өтті.
– Клиникалық фармация бөлімін құ-ру – медициналық көмектің сапасы мен қауіпсіздігін арттырады. Бұл – цифрлық шешімдердің аурухана жұмысын жүйелеп, науқастарды тиімді емдеуге мүмкіндік бе- реді, – деді ол.
Аудан тұрғындары да денсаулық сақтау саласындағы өзгерістерді оң бағалап отыр.
– Қазір медициналық көмек алу жеңілдеп, бәрі бір жүйеге келтірілді. Денсаулық сақтау саласының шынымен дамып келе жатқанын көріп отырмыз, – дейді Көксу ауданының тұрғыны Ерлан Сәрсенов.
Гүлжан ТҰРСЫН
