Еліміздің ауруханаларында жүретін шұғыл оталарға кейде қан жетіспей, көптеген адам қиналып қалып жатады. Осыған орай ақпан айы «өтеусіз донорлық айы» деп жарияланды.
Бастаманы қолдаған Қазақстан Республикасы Денсаулық сақтау министрі Ақмарал Әлназарова алғашқылардың бірі ретінде қан тапсыру челленджін әріптестеріне жолдады. Елордадан бастау алған ізгі істі жалғастырған облыстық денсаулық сақтау басқармасының басшысы Асқар Садықов облыстық қан орталығында тексеруден өтіп, жарамдылығы анықталған соң қан тапсырды.
– Шара адамдардың өмірін сақтап қалу, бір-біріне көмек көрсету үшін жасалуда. Айлық аясында донорлыққа байланысты ақпараттық түсіндіру, көшпелі қан өткізу акциялары ұйымдастырылады. Жастармен кездесулер өткізіледі. Сондай-ақ, донорлық мәдениетті қалыптастыру жайы да қолға алынады, – дейді Асқар Маратұлы.
Облыстық қан орталығының директоры Ләззат Мейрембекованың айтуынша 100 шақты адам донорлық тізімде тұр. Соған қарамастан күніне қан өткізетіндердің саны әртүрлі болатын көрінеді. Қан өткізер кезде олардың денсаулығы қатаң қадағаланып, алынған қан арнайы қорда сақталады.
– Қажет болған жағдайда донорлар шақырылып, мұқтаж жандарға көмек көрсетеді. Сол үшін оларды әкелу, апару, яғни, тасымалдау шаралары на- зарда ұсталынады. Бүгінде орталықта қан қоры жеткілікті, – деген орталық директоры кей күндері 20 шақты адам, кейде 60 адам өз еркімен қан өткізетінін айтады.
«Адамның күні адаммен» деген осы. Астанадан бастау алған челлендждің ел ішінде донорлыққа деген дұрыс көзқарасты қалыптастыруда, жастарды қиналған жанға көмек қолын созуға тәрбиелеуде атқаратын рөлі зор.
Гүлжан ТҰРСЫН
