Ақиық ақын Мұқағали Мақатаев қалдырған әдеби мұра – қазақ халқының баға жетпес қазынасы. Жыр алыбының кіндік қаны тамған қасиетті Қарасаз топырағы – оның шығармашылық бастауы, рухани бесігі. Өмірдің ұясынан өлеңнің қиясына самғаған ақынның ғұмыры қысқа болғанымен, артына мәңгілік мұра қалды.
Туған елін, кең байтақ Отанын жырға қосқан ақынның жүрек сөзі, жан сыры, сағынышы мен мұңы шығармаларының өн бойынан айқын сезіледі. Оның әрбір өлеңі – халықтың үні, уақыттың тынысы, жүректің лүпілі.
Ақынның туғанына 95 жыл толуына орай Қоғалы арнаулы әлеуметтік қызмет көрсету орталығы мен Қоғалы ауылдық кітапханасының ұйымдастыруымен «Мұқағали – мәңгілік ғұмыр» атты әдеби-сазды кеш өтті. Кітапхана меңгерушісі ақынның өмір жолы мен шығармашылығы жайында мазмұнды баяндама жасап, көрермендерге бейнеролик ұсынды.
Іс-шарада А. Азаматқызы, С. Джапашева, Б. Қалыбаева, К. Шолданбаева бейнежазба арқылы ақын өлеңдерін оқыса, арнаулы әлеуметтік қызмет көрсету орталығының қызмет алушылары (А. Садықов – «Күрсінбеші», И. Иваньчин – «Сәби болғым келеді», Ш. Исаева – «Арулар асыл жандар», Б. Албанбекова – «Сарыжайлау», А. Жорықбаев – «Қош, енді қош бол, күрең күз!») ақынның жырлары мен әндерін орындап кештің көрігін қыздырды. Ал мәнерлеп оқуда Б. Ахметова, А. Молдыбекова, А. Заңғыбеков, А. Шангиреева ақын жырларын көркем нақышына келтіре оқыды. Сондай-ақ, Еламан Ахметов пен Ерасыл Байтұлақовтың орындауындағы «Мұқағали мен Нұрқасым» атты көрініс қатысушыларға рухани әсер сыйлады.
«Ғасыр ақыны» атанған Мұқағали жырлары жылдан-жылға, ғасырдан-ғасырға жалғаса бермек. Оның өшпес мұрасы – ұлт руханиятының мәңгілік шамшырағы.
Райхан БАЙТАЕВА,
Қоғалы ауылдық кітапхана меңгерушісі
Кербұлақ ауданы
