Талдықорған қаласындағы №14 мектеп-гимназиясында қазақ поэзиясының мұзбалағы Мұқағали Мақатаевтың туғанына 95 жыл толуына орай «Жырлайды жүрек» атты әдеби-сазды кеш өтті. Рухани шараның мақсаты – ақынның өмірі мен шығармашылығын таныту, поэзиясының өміршеңдік сырын ұғындыру және сөзіне жазылған әндерді көпшілікке ұсыну.
Кеш шымылдығы «Есіңе мені алғайсың» әнімен ашылды. Алғашқы сөз мектеп директоры Жазира Камизанқызы Естибаеваға беріліп, ол Мұқағали мұрасының қазақ руханиятындағы орнына тоқталды. Тағылымды кештің өтуыне мұрындық болған 4а сынып жетекшісі Ләззат Қасымбайқызы, Қазақ тілі мен әдебиеті пәні мұғалімі Әсел Ақын және білікті ұстаздардан тәлім алып жүрген І.Жансүгіров атындағы Жетісу университетінің 4-курс студенті, іс-тәжірибеден өтуші Аяулым Дидарқызының еңбегін ерекше атап өткен жөн.
Сонымен әдеби бөлімде 4«А» және 10«Г» сынып оқушылары ақын өлеңдерін жатқа оқып, поэзиялық композициялар ұсынды.Әсіресе 4 «а» сыныбының оқушылар Азиза Бауыржан, Димаш Мерейұлы, Жансұлтан Саматов, Нұрай Асхатқызы, Алина Рүстемқызы, Айша Қалиасқар, Малика Ержігіт, Айсұлтан Рахимжан, Арнай Ғабит, Алуа Рүстемқызы, Рәбиға Қаһарман, Кәусар Жәнібек, Ажар Мейрамбек, Абдурахим Жұмағали ақын өлеңдерінің маңыздылығын терең түсінген өлең оқуынан ақ анық байқауға болады. Сондай-ақ, жырды мәнерлеп жеткізіп қана қоймай, ақынның көңіл күйін, ішкі толғанысын сахналық бейнемен бере алды.
Көрермен ықыласы соның айқын дәлелі болды.
Шараға ата-аналар мен ұстаздар да қатысып, ақын шығармаларын орындады. Кеш мазмұнын тереңдеткен тұстың бірі – «Аққулар ұйықтағанда» поэмасынан қойылған көрініс.
Кәусар Қадырхан, Нұрболат Құрал, Жалғас Бораш, Айбек Қызырғалиев, Жасұлан Саматовтың таланты келген жұртты сүйсіндірді. Ана мен табиғат арасындағы қасіретті байланыс арқылы оқушылар поэзияның көркем сөз ғана емес, жауапкершілік пен тағдыр айнасы екенін таныта білді. Бағдарлама домбыра әуенімен жалғасып, Мұқағали өлеңдерінің әнмен тағдырлас тұратын табиғатын тағы бір мәрте көрсетті.
Шара аясында ұйымдастырылған сурет көрмесінде оқушылар Арсен Мұрат, Ерхан Әміре, Абдурахим Жұмағали ақын жырларындағы туған жер, тау мен табиғат бейнелерін қылқалам арқылы суреттей білген. Бұл көрме поэзияның көркемдік кеңістігі тек сөзбен шектелмейтінін аңғартты. Кеш соңында шараға белсене атсалысқан ата-аналар мен оқушыларға марапаттар табыс етілді.
Ақынның өз сөзімен айтқанда, оның жырлары – тұтас ғұмырдың үні. Сол үн бүгінгі ұрпақ жүрегінен орын алып, рухани сабақтастықтың жалғасып жатқанын байқатты. «Жырлайды жүрек» кеші ақынды еске алу ғана емес, ақынмен сырласу сәтіне айналды.
Акбота АЗИМБАЕВА,
ЖУ студенті
