Оқушылардың әдеби-шығармашылық қабілетін дамытып, ұлттық және заманауи әдебиетке қызығушылығын арттыруға бағытталған «Жас қаламгер» үйірмесі Талдықорғандағы «Оқушылар сарайында» жұмыс істеп жатыр.
«Жас қаламгер» үйірмесіне арналған авторлық бағдарлама – оқушыларды көркем сөз өнеріне баулуға, әдеби тілде еркін жазуға және шығармашылық тұрғыда ойлауға бағытталған тиімді педагогикалық құрал.
Қазіргі білім беру кеңістігінде оқушы тұлғасын жан-жақты дамыту, оның шығармашылық әлеуетін ашу – басты міндет. Әсіресе ақпараттық қоғам жағдайында ойды сауатты жеткізе білу, жазбаша тіл мәдениетін меңгеру, әдеби талдау жасау дағдылары өзектілігін арттыра түсуде. Осы тұрғыда қосымша білім беру жүйесіндегі шығармашылық бағыттағы үйірмелердің рөлі ерекше.
Бүгінгі жасөспірімдер ақпаратты көп тұтынғанымен, оны саралап, жүйелі ой қорытып, өз көзқарасын жазбаша түрде жеткізуде қиындықтарға жиі кездеседі. Әдеби шығармаларды үстірт қабылдау, сөздік қордың жұтаңдығы, ойды көркем жеткізе алмау – бұл бағдарламаны енгізудің негізгі алғышарттары.
«Жас қаламгер» үйірмесі оқушылардың тіл байлығын арттыруға, көркем ойлау мен қиялды дамытуға, ұлттық әдеби мұраларға құрмет сезімін қалыптастыруға, қазіргі әдеби үдерістерді түсінуге мүмкіндік береді.
Бағдарлама бір оқу жылына (72 сағат) есептелген және 7 бөлімнен (Кіріспе және мотивация; Проза негіздері; Поэзия негіздері; Эссе және публицистика; Әдеби талдау және сын; Авторлық жоба; Қорытынды және бағалау) тұрады. Әр бөлім оқушылардың жас ерекшеліктеріне сай құрастырылып, теориялық білім мен практикалық шығармашылық жұмысты ұштастыруға бағытталған.
Бағдарламада мұғалім бағыт-беруші, кеңесші, мотивация беруші рөлін атқарады. Ал оқушы – ізденуші, автор, сыншы және шығармашыл тұлға ретінде әрекет етеді. Мұндай өзара әрекет оқушының дербестігін, жауапкершілігін арттырады.
Бағдарлама нәтижесінде оқушылар: авторлық өлең, әңгіме, эссе жаза алады; көркем мәтінді талдауға машықтанады; әдеби талғамы мен сөз мәдениеті қалыптасады; өз шығармашылық портфолиосын жинақтайды; байқаулар мен әдеби кештерге қатысуға дайын болады.
Қорыта айтқанда, «Жас қаламгер» үйірмесінің авторлық бағдарламасы – оқушылардың шығармашылық, әдеби және тұлғалық дамуын қамтамасыз ететін тиімді педагогикалық жүйе. Бағдарлама қосымша білім беру ұйымдарында кеңінен қолдануға лайық және жас ұрпақты көркем сөз өнері арқылы тәрбиелеуге зор мүмкіндік береді.
Жансая ҚАБДЕН
Талдықорған қаласы Оқушылар сарайы
«Жас қаламгер» үйірмесінің жетекшісі
