Рас, әлемге белгілі футболшылар Қазақстанда тұрмағанымен, аттастары елімізде дүниеге келіп, өмір сүріп жатыр. Қазақ қашанда есім қойғанда ерекше мән берген. Бүгінде заман ағымына орай түрлі есімдер қойып, мағынасын жан-жақты түсіндіріп, ырымдап жатады. Өткен жылы елімізде көп қойылған емсімдермен ерекше аттарға тоқталсақ.
Халық қаһарманы Бауыржан Момышұлы: «Адамға дүниеге келгенде берілетін есім – оған өмір жолында бағыт сілтейтін жарық жұлдыз іспетті: өмір бойы жаны болатын алғашқы және қасиетті белгілердің бірі» деген еді. Жақсы есім бала болмысының қалыптасуына, өзін танып, тұлға болып дамуына тікелей әсер етпек.
Ұлттық статистика бюросының мәліметіне сәйкес өткен жылы елімізде дүниеге келген сәбилерге ең жиі қойылған есімдер: Ер балаларға – Мұхаммед (2537 балаға), Әлихан (2330), Айсұлтан (2305); Қыз балаларға – Айлин (5305 қызға), Асылым (4302), Медина (3942).
Ал өңірлер бойынша:
Ерекше есімге ие балаларда бар. Мәселен, Роналду есімді балақай Қызылордада тұрады. Бүгінде 3 жасқа толды. Ал одан екі жас кіші Месси Шымкентте жүр. Даңқты ойыншылардың да жас айырмашылығы дәл осы екі балақайдай. Одан бөлек елімізде Илон есімді 10, Мозес атты 1 қазақ бар. Конор деген 1, Тайсон есімді 4 бала жүр.
– Есім тағдырға әсер етсін, етпесін дұрыс ат қою адами борыш. Бастысы – ешқандай таңдау құқығы жоқ жаңа туған нәрестеге өмірлік есім қойып жатқанымызды ұмытпасақ екен. Одан кейінгі мәселе баланың есейетінін де ойлап, барлық уақыт кезеңіне сай атты таңдаған да дұрыс. Міне, есім қоюдың оңай еместігі осындай тұстардан көрінеді. Себебі бала дүниеге келді дегенді естігенде, қуанып одан бөлек абдырап қалатынымыз да сол, – дейді журналист Дариға Нысанқұл.
Есім адам өміріне әсер ететіндігі жиі айтылады және оған түрлі дәлел келтіретіндер көп. Ерекше есімге ие балақайлар келешекте ел дамуына өзінше үлес қосады деген үміт бар. Балаға ат қоярда оның әдемілігін емес, салмағын өлшеген жөн. Адам өміріне жазылған алғашқы жауапкершілік болғандықтан салқынқанды қарау қажет.
Серік ҚАНТАЙ
