Қазақстан Республикасы Бәсекелестікті қорғау және дамыту агенттігінің Жетісу облысы бойынша департаменті айранды көтерме өткізу нарығындағы бәсекелестік жағдайына талдау жүргізуді аяқтады, – деп хабарлайды 7-su.kz ақпараттық порталы.
Талдау нәтижелері бойынша «АК-БУЛАК ПРОДУКТ» ЖШС жекелеген тұтынушыларға майлылығы 2,3-2,5% болатын жұмсақ қаптамадағы айранды өткізу кезінде әртүрлі бағалар мен өткізу шарттарын қолданғаны анықталды. Атап айтқанда, жеткізу шарттарында бағаның өзгеруі туралы хабарлау мерзімдері әртүрлі белгіленген, сондай-ақ өнімді контрагенттерге объективті түрде расталған себептерсіз әртүрлі бағамен сату фактілері анықталған.
Аталған әрекеттер Қазақстан Республикасының Кәсіпкерлік кодексінің 174-бабы талаптарына қайшы келеді, онда объективті негіздерсіз тең дәрежедегі шарттарға әртүрлі бағалар мен талаптарды қолдануға тыйым салынған.
Бұзушылықтарды жою мақсатында Департамент тарапынан хабарлама жолданды. Қазіргі уақытта хабарлама орындалып, шарт талаптары мен бағалар бірыңғай әрі кемсітусіз жағдайларға келтірілді.
