Жаркенттегі «Баркөрнеу» сауда үйінің бірінші қабатында боулинг және бильярд орталығы ашылды. Кәсіпкер Нұртас Сегізбай ойын-сауық орталығын ашуға қомақты қаржысын жұмсаған екен.
Орталықта 8 бильярд столы, 4 боулинг алаңының жолағы бар. 30 адам тұрақты жұмыспен қамтылған. Жалпы аумағы 800 шаршы метрді қамтитын кешенде келушілерге емін-еркін спортпен шұғылдануына жағдай жасалған.
Жаңа орталықтың жұмысымен танысып, жас кәсіпкердің іскерлігіне қолдау көрсеткен аудан әкімі Марат Сағымбек ашылу салтанатында құттықтау тілегін білдірді.
– Жергілікті кәсіпкерлер қаржысын өңірдің өркендеуіне жұмсап жүргенін өздеріңіз де білесіздер. Осы орталықтың ашылуына кәсіпкер 150 миллион теңгеге жуық қаржысын жұмсаған. Бұл аудан экономикасына тартылған жаңа инвестиция. Оның сыртында 30 адамды жұмыспен қамтамасыз етті, – деді аудан басшысы.
Салтанатты шараға келушілердің айтуынша Жаркент өңірінде бірінші рет ашылған боулинг жай ғана ойын емес. Ол осы залға келген әр адам үшін достарымен көңіл көтеріп, сауық құратын мереке. Мұнда бұрын да қонақүйлер мен жеке адамдар үйіне қойып жүрген бильярд ойыны да әріптес достар ортасында қол мен көз мергендігін, жан шеберлігін сынайтын бәсекеге негіз спорттың түрі. Жаңа ойын-сауық отауы тұрғындардың қызығушылығын арттыратыны сөзсіз.
Мырзағали НҰРСЕЙІТ
Панфилов ауданы
