Кәсіпқой бокстан әлем чемпионы Жәнібек Әлімханұлының қанынан тыйым салынған заттың табылуына қатысты жаңа деректер белгілі болды. Қазақстан кәсіпқой бокс федерациясының (ҚКБФ) президенті Рахымжан Ерденбеков спортшының 2025 жылғы мамыр мен желтоқсан аралығында допинг-бақылаудан өтпегенін мәлімдеді, – деп хабарлайды 7-su.kz ақпараттық порталы Tengri Sport сайтына сілтеме жасап.
Шетелдік БАҚ беттерінде қазақстандық боксшының дисквалификациялану себептеріне қатысты федерация басшысының түсініктемесі жарияланды. Тергеу қорытындысы бойынша, Әлімханұлының әрекетінде «салғырттықтың минималды деңгейі» анықталып, оған айып тағылған сәттен бастап алты ай мерзімге шеттету жазасы кесілген. Алайда Бүкіләлемдік бокс ұйымы (WBO) чемпионды бір жылға дисквалификациялаған болатын. Екі ұйымның шешіміндегі айырмашылыққа байланысты Жәнібектің рингке қайта оралу мерзімі әлі де нақтыланып жатыр. ҚКБФ шешімі маусым айында аяқталғанымен, жазда жекпе-жек өткізу үшін халықаралық ұйымдар мен допинг-сынама алынған штат комиссиясының рұқсаты қажет.
Даудың тағы бір маңызды тұсы – тыйым салынған заттың ағзада анықталу мерзімі. Спортшының менеджері Эгис Климас мельдоний заты Әлімханұлының ағзасына 2025 жылғы мамыр айындағы шұғыл медициналық көмек кезінде түскенін алға тартады. Ресми айып тек желтоқсанда ғана тағылған. Федерация басшысының айтуынша, мамыр мен желтоқсан аралығында боксшыдан ешқандай талдау алынбаған, сондықтан затты ертерек анықтау техникалық тұрғыдан мүмкін болмаған. Желтоқсандағы тексеріс медициналық араласудан кейінгі алғашқы тест болғандықтан, мельдонийдің ізі сол кезде бір-ақ белгілі болды.
Арнайы комиссияның зерттеуі бойынша, мельдоний спортшыға мамыр айында егілген «Рипронат» препаратының құрамында болған. Бұл жағдай 2025 жылғы желтоқсанда кубалық Эрисланди Ларамен өтуі тиіс үш чемпиондық белбеу үшін талас алдында ашылды. VADA антидопингтік комиссиясының мәлімдемесінен кейін боксшы жекпе-жектен шеттетіліп, ұзақ тергеу басталды. 2026 жылдың басында ашылған «В» сынамасы да тыйым салынған заттың бар екенін растады.
Қазіргі таңда WBO ұйымы Жәнібекті белбеуінен айырған жоқ, бірақ келесі желтоқсанға дейін рингке шығуына тыйым салды. Ал IBF ұйымы әзірге ресми шешімін жариялаған жоқ. Осы уақыт бойы Әлімханұлының командасы спортшының таза спорт принциптерін ұстанатынын және заңсыз затты әдейі қолданбағанын дәлелдеуге тырысып келеді.
