Денсаулық сақтау министрлігінде 8 наурыз – Халықаралық әйелдер күніне орай үздік медицина қызметкерлерін салтанатты марапаттау рәсімі өтті. Бүгінде еліміздің денсаулық сақтау жүйесінде 280 мыңға жуық маман еңбек етсе, олардың 70 пайыздан астамы – әйелдер. Саланың дамуына өлшеусіз үлес қосып жүрген 56 мың дәрігер мен 167 мың мейіргердің еңбегі ерекше, – деп хабарлайды 7-su.kz ақпараттық порталы.
Денсаулық сақтау министрі Ақмарал Әлназарова саладағы әйелдердің рөлін жоғары бағалады. Министр өз сөзінде:
«Бүгінде біздің әйелдер – жүйенің сенімді тірегі, жаңа бастамалардың көшбасшысы, медицина саласындағы кадрлардың жартысынан астамын құрайтын қуатты күш. Реформалардың табысты жүзеге асуы, азаматтардың денсаулығын жақсарту және профилактикалық бағытты күшейту – көп жағдайда сіздердің еңбектеріңіздің нәтижесі. Сіздердің кәсібиліктеріңіз бен іске деген адалдықтарыңыз бүкіл саланың тұрақтылығын қалыптастырады», – деп атап өтті.
Министр Мемлекет басшысының тапсырмасымен медицина қызметкерлерінің жалақысын арттыру, инфрақұрылымды жаңғырту және саланы цифрландыру бойынша жүйелі жұмыстар жүріп жатқанына тоқталды. Ол:
«Біздің басты мақсатымыз – әрбір азаматқа сапалы әрі қолжетімді медициналық көмек көрсету, балалар мен аналардың денсаулығын нығайту. Осы мақсатта «Ана саулығы» және «Қазақстан балалары» бағдарламалары іске асырылуда. Саланың ең басты құндылығы – адамдар. Ал медицинадағы адами капиталды қалыптастыруда әйелдердің үлесі айрықша», – деді ведомство басшысы.
Айта кетерлік жайт, соңғы екі жылда нәресте өлімі 20 пайызға төмендеп, тарихи ең төмен деңгейге жетті. Қазақстан қазіргі таңда Орталық Азиядағы нәресте өлімі ең төмен елдер қатарында. Салтанатты рәсім барысында саланың 30 үздік өкілі министрдің қолынан «Еңбек ардагері» медалі мен «Денсаулық сақтау ісіне қосқан үлесі үшін» төсбелгісін алды. Жиын соңында министр барлық әйел медицина қызметкерлеріне амандық пен жаңа кәсіби жетістіктер тіледі.
