Күннің шуағымен жер беті жылынса, ана махаббаты күллі әлемді жылытады. Ана. Осы бір үш алтын әріптен тұратын жалғыз-ақ сөздің астарында ғаламат сүйіспеншілік пен ұлы сезім жатыр. Кербез көктемнің шуақты күндерімен бірге келген 8 наурыз – Халықаралық әйелдер күніне орай ақ жаулықты аналарға құрмет көрсету мақсатында Б. Римова атындағы Талдықорған академиялық драма театрында салтанатты кеш өтті. Мерекелік шараға қатысқан облыс әкімі Бейбіт ИСАБАЕВ түрлі салада белсенділік танытып жүрген нәзік жандарды марапаттады.
Жиынға облыстың әр өңірінде түрлі салада жемісті еңбек етіп жүрген қарапайым қызметкерлерден бастап, ақ жаулықты әжелер мен алтын құрсақты аналар, аймақ дамуына үлес қосқан, бесігін де, кәсібін де тербеткен 500 ару қатысты.
Шарада сөз алған аймақ басшысы Бейбіт Өксікбайұлы мерекелік көңіл-күймен жиналған әйелдер қауымын төл мейрамдарымен құттықтады.
– Биыл даңқты жерлесіміз Бәтима Сақауованың туғанына 100, Социалистік Еңбек Ері Зылиха Тамшыбаеваға 90 жыл толып отыр. Сол сияқты бүгін Социалистік Еңбек Ері Күләш Айтжанова апамыздың ортамызда отырғаны біз үшін үлкен мақтаныш. Осындай игі дәстүрді жаңа дәуірде жаңғыртып, қоғам ісіне белсене араласып жүрген замандастарымыз да жетерлік. Олардың қатарында егіншілікпен айналысатын алакөлдік Оразғаным Молдағалиева, көксулық аспаз Жұлдыз Шәкіржанова, Ақсу аудандық электр жүйелерінің инженері Алтынай Жолдасбай, «Текелі су құбыры» мекемесінің операторы Марина Коваленко сияқты көптеген әйел азаматтардың есімін ризашылықпен атаймыз. Осы орайда елдің дамуына қосып жүрген елеулі үлестеріңіз үшін баршаңызға шынайы алғысымды білдіремін. Отбасы – мемлекеттің тірегі, ал ана – шаңырақтың ұйытқысы. Облыста 10 мыңнан астам «Алтын алқа», «Күміс алқа» иегерлері бар. Бұл – біз үшін үлкен мақтаныш. Өйткені көпбалалы аналардың қоғамдағы рөлі – елдің әлеуметтік келбетінің айнасы, – дей келе аймақтың өркендеуіне сүбелі үлес қосқан жандарды марапаттап, Мемлекеттік наградалар табыстады.
Атап айтсақ, Қ. Тоқаев атындағы қайырымдылық қорының өкілі Валентина Спиридонова «Қазақстанның еңбек сіңірген қайраткері» атағын алды. Облыстық қаржы басқармасының басшысы Жанар Керімбекова және облыс әкімі аппаратының бөлім басшысы Эльмира Жырғалбаева «Құрмет» орденін омырауына тақты. Қоғалы орта мектебінің мұғалімі Нұргүл Арпабекова мен облыстық еңбек мобильдік орталығы, Алакөл аудандық мансап орталығы филиалының директоры Ләззат Қосантаева «Ерен еңбегі үшін» медалімен марапатталды. Талдықорған қалалық көпсалалы ауруханасының аға мейіргері Бақытгүл Иманбекова «Шапағат» медалін алды. Облыстық қоғамдық кеңестің мүшесі Дания Қыдырбаеваға Мемлекет басшысының құттықтау ашық хаты табысталды. Сонымен қатар, «Алтын алқа» мен «Күміс алқа» иелері де мерейленді. Шара барысында ғазиз аналар ризашылығын жеткізіп, елдің амандығын тілеп, ақ баталарын берді. Айта кетейік, мерекеге орай «Идрисова» шаруа қожалығының басшысы Шакира Идрисова Астананың төрінен І дәрежелі «Еңбек даңқы», «Үштөбе-Айдын» ЖШС құрылтайшысы Айбарша Бескемпірова ІІІ дәрежелі «Еңбек даңқы» орденімен марапатталды.
Бір қолымен бесікті, бір қолымен әлемді тербеткен, аймақтың өркендеуіне зор үлес қосқан аяулы жандарға арналған шара концерттік бағдарламаға ұласты.
Айдар ҚАЛИЕВ
