Жаңа өндіріс орындарының іске қосылуы – Жетісу өңірі үшін маңызды экономикалық жаңалықтардың бірі. Талдықорғанның өнеркәсіптік әлеуеті өзінің сенімді даму қарқынын көрсетуді жалғастыруда. Ағымдағы жылы облыс орталығының индустриялық белдеуі екі заманауи кәсіпорынмен толыққалы отыр. Жаңа жобаларға салынған инвестициялардың жалпы көлемі 2,3 млрд. теңгені құрап, 70 тұрақты жаңа жұмыс орнын ашуға мүмкіндік береді.
Осы жылы жүзеге асатын маңызды жобалардың бірі – «Jetisu Agro Complex» ЖШС («BNK Irrigation») шағын зауытын ашу. Кәсіпорын жаңбырлатып суару құрылғыларын шығарады, бұл өңірдегі заманауи суармалы ауыл шаруашылығын дамытуға қажетті құрал-жабдық. Жоба құны 2 млрд. теңге шамасында, оның іске қосылуы 40 маманды жұмыспен қамтуға жол ашады.
Екінші маңызды нысан – «Kazakhstan Quartz» ЖШС-нің отқа төзімді кірпіш өндірісі болмақ. Барлығы 280 млн. теңге көлеміндегі инвестициялар технологиялық желіні іске қосуға және 30 жаңа жұмыс орнын құруға мүмкіндік береді.
Айта кетейік, өткен жылы шаһардың өнеркәсібіне 3 жаңа өндіріс нысаны қосылды. Олар «Дәмді» жеке кәсіпкерлігі кондитерлік өнімдер цехы, «Стальбетон» ЖШС автоклавты газбетон блоктары зауыты және «DENK» ЖШС электроэнергетикалық жабдықтар шығаратын кәсіпорны. Одан бөлек, өңірлік индустрияның жетекші кәсіпорындары – «Алмаз-Керамикс» ЖШС және «Қайнар-АКБ» ЖШС зауыттары өз өндіріс қуаттарын ұлғайтты.
Өткен жылдың қорытындысы бойынша Талдықорған қаласы экономикасының барлық саласында өсім қамтамасыз етілді. Мәселен, өнеркәсіптегі көрсеткіш 4,3%, бөлшек сауда айналымы 9,4%, ауыл шаруашылығы 1,1%, ал құрылыс жұмыстарының көлемі 27,7%-ға ұлғайды.
Жалпы алғанда, Талдықорғанда жаңа өндірістің іске қосылуы өңірдің әлеуметтік-экономикалық дамуына оң әсер етуі мүмкін. Өндіріс көлемінің артуы, жаңа жұмыс орындары және инвестиция тарту – аймақтың тұрақты дамуына негіз болатын факторлар.
Мамандардың айтуынша, егер жобалар жүйелі түрде жүзеге асырылса, Талдықорған алдағы жылдары Жетісу өңіріндегі маңызды индустриялық орталықтардың біріне айналуы ықтимал.
Айгүл БАЙБОСЫНОВА
Талдықорған қаласы
