Бүгінде Жетісу облысының орталығында ішкі көше жолдарын ретке келтіру жұмыстары жалғасуда. Өткен жылы шаһарда 50 шақырымға жуық жол жөнделсе, биыл тағы 70 шақырым жол ретке келтірілмек.
Талдықорған қаласы әкімінің орынбасары Қуаныш Сейтімбетовтің айтуынша, қазір облыс орталығындағы көше жолдарының жалпы ұзындығы 660 шақырымнан асады. Оның 509 шақырымына асфальт төселсе, 132 шақырымы қиыршықты тас, 19 шақырымы жабындысыз жол.
– Қазір қала аумағындағы «Құлагер», «Бірлік», «Жастар-1» шағын аудандарында және «Солтүстік-Батыс» тұрғын үй алабында жалпы 54 шақырымға жуық жол құрылысы жүргізілуде. Осылайша аймақтағы жаңадан бой түзеп келетін аудандарда 107 көше салынады. Сонымен қатар, биылғы жылы 21,5 шақырым жол күрделі, 22 шақырымнан астамы орташа, ал, 17 шақырымнан астам жол ағымды жөндеуден өткізілетін болады, –дейді шаһар басшысының орынбасары.
Айдын КӘЛІМХАН
