Көксу ауданына қарасты 10 жылдық Қазақстан ауылында республикалық референдум күні бұрын-соңды болмаған ерекше белсенділік байқалды. Мұндағы №264 сайлау учаскесіне ауыл халқы бір мезетте жаппай келіп, өз азаматтық ұстанымдарын танытты, – деп хабарлайды 7-su.kz ақпараттық порталы.
«10 жыл Қазақстан» ауылының 200-ден астам тұрғыны ұйымдасқан түрде сайлау учаскесіне келіп, маңызды саяси науқанға қатысты. Бұл жай ғана дауыс беру емес, ауыл халқының ел болашағына деген ортақ жауапкершілігі мен бейжай қарамайтындығының айқын көрінісі. Көпшіліктің мұндай қызу қатысуы сайлау учаскесінде нағыз халықтық мереке атмосферасын қалыптастырды.
Дауыс беру барысында барлық заңнамалық талаптар қатаң сақталып, учаске комиссиясы тарапынан тиісті деңгейде ұйымдастыру жұмыстары жүргізілді. Әрбір сайлаушы тіркеуден өтіп, бюллетень алып, өз таңдауын еш кедергісіз жасады.
Ауыл тұрғындарының пікірінше, референдум – мемлекеттің даму жолын айқындайтын тағдыршешті кезең. Сондықтан әрбір азаматтың дауысы ел тағдырына қатысты шешімдерге тікелей әсер етеді. Мұндай жаппай белсенділік қоғамдағы демократиялық құндылықтардың нығайып, азаматтық қоғамның дамып келе жатқанын дәлелдейді.
Жалпы алғанда, №264 сайлау учаскесіндегі процесс ашық, жариялы әрі жоғары ұйымдасқан түрде өтуде. Көксу ауданының тұрғындары осы арқылы өздерінің саяси сауаттылығы мен бірлігін тағы бір мәрте паш етті.
