Қазақстан Республикасы Экология және табиғи ресурстар министрлігінде ауылдық елді мекендердегі қатты тұрмыстық қалдықтарды жинау және шығару мәселелері бойынша кеңейтілген онлайн-кеңес өтті, – деп хабарлайды 7-su.kz ақпараттық порталы.
Вице-министр Жомарт Әлиевтің төрағалығымен өткен жиынға министрлік өкілдері, «Жасыл даму» АҚ басшылығы және облыс әкімдіктері қатысып, елді мекендердегі қалдықтарды басқару реформасын жан-жақты талқылады. Өткен аптада Парламент депутаттарына ресми таныстырылған жаңа модельдің басты бағыты – ауылдық жерлердегі қордаланған экологиялық мәселелерді жүйелі түрде шешу. Мамандардың бағалауынша, қазіргі жағдай Қазақстан халқының 37 пайызын, яғни 7,4 млн-нан астам адамды тікелей қамтып отыр. Ауылдық аумақтарда қоқыс шығару қызметінің экономикалық тұрғыдан тиімсіз болуы жеке бизнестің аталған салаға келуіне басты кедергі келтіруде. Салдарынан операторлар саны шектеулі болып, елді мекендердің айналасында рұқсатсыз қоқыс үйінділерінің бақылаусыз көбеюіне әкеп соқты. Аталған проблемалардың жиынтығы қоршаған ортаға ғана емес, халықтың денсаулығына да кері әсерін тигізуде.
Осыған орай, Мемлекет басшысы рұқсатсыз үйінділер мәселесін шұғыл шешуді және ауылдық өңірлерді дамытуға басымдық бере отырып, тиімді басқару жүйесін қалыптастыруды тапсырды. Мәселені шешудің нақты тетігі ретінде «Жасыл даму» АҚ тарапынан ауылдық инфрақұрылымды дамытуға бағытталған жеңілдетілген қаржыландырудың жеке бағдарламасын іске асыру мүмкіндігі қарастырылуда. Аталған қолдау шаралары жаңа жобалардың бизнес үшін экономикалық тартымдылығын арттырып, жүйенің ұзақ мерзімді әрі тұрақты жұмыс істеуін қамтамасыз етеді. Қазіргі уақытта Экология министрлігі облыс әкімдіктерімен бірлесіп, өңірлердегі қолданыстағы инфрақұрылым мен елді мекендердің нақты қажеттіліктеріне кешенді талдау жүргізу үстінде. Жоспарланған жұмыс аясында әр ауылдың логистикалық мүмкіндіктері мен қоқыс полигондарының жай-күйі де ескеріледі. Жүргізілген кешенді зерттеулердің нәтижесінде ауылдық жерлерде қалдықтарды жинау жүйесін ұйымдастыру бойынша нақты өңірлік жоспарлар әзірленеді.
Қабылданған іс-шаралар қызмет көрсету деңгейін сапалы арттырып, рұқсатсыз үйінділерді толық жоюға және ауылдық өңірлерді экологиялық тұрғыдан сауықтыруға үлкен мүмкіндік береді. Осылайша, мемлекет пен бизнестің бірлескен әрекеті ауыл тұрғындарының өмір сүру сапасын жаңа деңгейге көтеруге бағытталмақ. Көзделіп отырған жұмыстар алдағы уақытта тұрақты бақылауда болады және әрбір ауылдық округтің тазалығын қамтамасыз етуге негізделеді. Жасалып жатқан қадамдар еліміздің экологиялық мәдениетін көтеріп, табиғатты сақтауға қосылған зор үлес болмақ.
