Қазақстанда Арнайы ХҚКО мен «Азаматтарға арналған үкімет» корпорациясының қызметкерлері қатысқан ірі сыбайлас жемқорлық схемасы анықталды. Ұлттық қауіпсіздік комитеті жүргізуші куәлігін заңсыз берумен айналысқан жүйелі қылмыстық топтың жолын кесті, – деп хабарлайды 7-su.kz ақпараттық порталы.
Жыл басынан бері Астана қаласы, Ақмола және Павлодар облыстарында жүргізуші куәлігін алу кезіндегі заңсыз ақша айналымына қатысты бірнеше дерек тіркелді. Тергеу мәліметтеріне сүйенсек, Астанадағы Арнайы ХҚКО басшысының бұрынғы орынбасары азаматтарнан жүйелі түрде пара алып отырған. Ол емтихан тапсырмаған адамдарға куәлікті кедергісіз рәсімдеп беруге көмектескен. Қазіргі уақытта құзырлы органдар 60-тан астам заңсыз әрекетті анықтады. Алдын ала есептеулер бойынша, заңсыз айналымдағы пара көлемі 100 млн теңгеден асқан. Мұндай келеңсіз жағдайлар Көкшетау мен Екібастұз қалаларында да қайталанған. Ондағы филиал басшылары емтихан тапсыру процесіне бөгде тұлғаларды қатыстырып, сол үшін қомақты сыйақы алып келген.
ҰҚК баспасөз қызметінің хабарлауынша, мемлекеттік корпорация қызметкерлері тек жүргізуші куәлігімен ғана шектелмеген. Олар жылжымайтын мүлік операциялары кезінде де заңсыз пайда тауып келгені белгілі болды. Мұндай бұзушылықтар Астана, Шымкент және Тараз қалаларында анықталды. Аталған фактілер бойынша қазіргі уақытта сотқа дейінгі тергеу амалдары жүргізілуде. Құрықталған күдіктілердің тізімі нақтыланып, олардың қандай жазаға тартылатыны тергеу соңында жарияланады.
Жүргізуші куәлігін сатып алу – тек жемқорлық қана емес, жол қауіпсіздігіне тікелей қатер төндіретін фактор. Тиісті дайындықтан өтпеген жүргізушілердің жолға шығуы қайғылы жағдайлардың көбеюіне себеп болады. Сондықтан мемлекет тарапынан заңсыздықтарға қарсы күрес күшейтіліп жатыр. Мамандар азаматтарды мемлекеттік қызметтерді алу кезінде заңды жолдарды ғана пайдалануға шақырады. Егер сіз жемқорлық деректеріне куә болсаңыз немесе сізден пара талап етілсе, дереу сыбайлас жемқорлыққа қарсы іс-қимыл қызметінің «1424» сенім телефонына хабарласуыңыз қажет.
