Елімізде биылғы жылдың алғашқы екі айында өмірге келген сәбилердің қатарында егіздер мен үшемдердің үлесі айрықша назар аудартады. Ресми дерекке сәйкес, осы кезеңде 224 егіз және 5 үшем дүниеге келіп, талай шаңыраққа қатарынан қуаныш сыйлады, – деп хабарлайды 7-su.kz ақпараттық порталы Kazinform-ға сілтеме жасап.
Ал өткен 2025 жыл қорытындысында 3 367 егіз бен 25 үшемнің туғаны тіркелген. Бұл көрсеткіштер елдегі демографиялық өсімнің тұрақты арнаға түскенін, көпұрықты жүктіліктің (көпұрықты жүктілік – медицинада ерекше бақылауды талап ететін үдеріс) жиілеп келе жатқанын аңғартады.
Қазақстан Республикасы Денсаулық сақтау министрлігі мәліметінше, ана мен бала денсаулығын сақтау бағытында оң динамика қалыптасқан. Перинаталдық көмек сапасының артуы, акушерлік-гинекологиялық бақылаудың күшеюі, неонатология саласындағы жетістіктер – осы нәтижелердің негізгі тірегі.
Ұлттық статистика бюросы ұсынған деректерге сүйенсек, елімізде шала туған нәрестелер саны азайып келеді. Бұл – перинаталдық кезеңдегі медициналық қызметтің тиімділігі артқанын, жүктілікті жүргізу мен босандыру тактикасының жетілгенін білдіреді.
Жалпы алғанда, денсаулық сақтау жүйесіндегі жүйелі реформалар мен профилактикалық шаралар ана мен бала өмірінің қауіпсіздігін нығайтып, ұлт саулығының берік іргетасын қалауға жол ашып отыр.
