Қазақтың күй өнерін әлемдік деңгейге көтерген көрнекті күйші, композитор, дирижер, ұлағатты ұстаз Қаршыға Ахмедиярұлының туғанына 80 жыл, – деп хабарлайды 7-su.kz ақпараттық порталы.
Қаршыға Ахмедиярұлы 1946 жылғы 25 наурызда Атырау облысы, Махамбет ауданына қарасты Таңдай ауылында дүниеге келген. Құрманғазы мен Динадай дүлдүлдер түлеген қасиетті өңірден қуат алған ол жастайынан күй өнеріне ден қойып, 1972 жылы Алматы мемлекеттік консерваториясының халық аспаптар факультетін тәмамдады. Кейін Мәскеуде жоғары дирижерлік білімін жетілдіріп, өнер өрісін кеңейтті.
Еңбек жолын Қазақтың халық аспаптар оркестрінде домбырашыдан бастап, дирижерлікке дейінгі биік белестерді бағындырды. Ұзақ жылдар бойы осы ұжымның көркемдік деңгейінің өсуіне елеулі үлес қосып, ұлттық оркестр өнерінің абыройын асқақтатты. Сонымен қатар Құрманғазы атындағы консерваторияда ұстаздық етіп, профессор, домбыра кафедрасының меңгерушісі ретінде талай дарынды шәкірт тәрбиеледі.
Қаршыға Ахмедиярұлы – күй жанрын байытқан дарынды композитор. Оның «Нарын», «Сағыныш», «Атамекен», «Қуаныш», «Атырау», «Ақ қайың», «Желдірме», «Қайран әке» сынды туындылары халық жадында сақталған рухани қазынаға айналды. Сондай-ақ «Шашақты найза, шалқар күн», «Шынар», «Табыну» жинақтары күй өнерінің алтын қорын толықтырды.
Өнер иесінің еңбегі елеусіз қалған жоқ. Ол Қазақстанның халық әртісі атағына ие болып, мемлекеттік және халықаралық деңгейдегі бірқатар марапаттарға лайық деп танылды. Оның орындаушылық шеберлігі мен шығармашылық қуаты алыс-жақын шетел көрермендерін де тәнті етіп, қазақ күйінің үнін әлем сахналарында асқақтатты.
Қаршыға Ахмедиярұлы қазақтың «Дәстүрлі 1000 күйі» антологиясын әзірлеуге зор үлес қосып, ұлт мұрасын жүйелеу ісінде де өлшеусіз еңбек сіңірді.
Күйдің қасиетін жүрекпен ұққан халық үшін Қаршыға Ахмедиярұлының ғұмыры өнерге адалдықтың, рухқа беріктіктің жарқын көрінісі. Оның сазбен кестеленген ғұмыр жолы мен мәңгілік мұрасы ұлт жадында жаңғырып, келер ұрпаққа рухани темірқазық бола бермек.
