Қазақстанның басым бөлігінде алдағы күндері жауын-шашынсыз, жылы көктемгі ауа райы сақталады, – деп хабарлайды 7-su.kz ақпараттық порталы «Қазгидрометке» сілтеме жасап. Тек батыс өңірлерде және оңтүстік облыстардың таулы аймақтарында жаңбыр жауып, күн күркірейді. Батыста кей жерлерде нөсер жауын күтіледі. Республика бойынша түнгі және таңғы уақытта тұман түсуі ықтимал.
Астанада құбылмалы бұлтты, жауын-шашынсыз ауа райы болжанады. Шығыстан соғатын желдің жылдамдығы 2-7 м/с. Ауа температурасы түнде 1 градус аяз бен 1 градус жылы аралығында, күндіз 14-16 градус жылы болады.
Алматыда жауын-шашынсыз, құбылмалы бұлтты ауа райы сақталады. Жел оңтүстік-батыстан және батыстан соғады, жылдамдығы 3-8 м/с. Түнде 10-12, күндіз 24-26 градус жылы. Іле Алатауының таулы аймақтарында да жауын-шашынсыз, алайда жел күшейіп, 9-14 м/с жетеді. Мұнда түнде 0-5, күндіз 12-17 градус жылы.
Шымкентте кей уақытта жаңбыр жауып, күн күркірейді. Желдің жылдамдығы 8-13 м/с, екпіні 15 м/с дейін жетеді. Ауа температурасы түнде 12-14, күндіз 27-29 градус жылы.
Жетісу облысында жауын-шашынсыз ауа райы күтіледі. Оңтүстік-батыстан соғатын желдің жылдамдығы 9*14 м/с. Түнде 2-7, оңтүстігінде 10 градус жылы, таулы аудандарда 2 градус аяз. Күндіз 21-26 градус жылы, шығыс және таулы аймақтарда 17 градус шамасында. Талдықорғанда құбылмалы бұлтты, жауын-шашынсыз. Жел 2-7 м/с. Түнде 2-4, күндіз 21-23 градус жылы.
Түркістан облысының оңтүстігі мен таулы өңірлерінде жаңбыр жауып, күн күркірейді. Желдің жылдамдығы 8-13 м/с, таулы аймақтарда 15-20 м/с дейін күшейеді. Түнде 12-17, күндіз 25-30 градус жылы. Түркістан қаласында жауын-шашынсыз, күндіз 28-30 градус жылы болады.
Батыс Қазақстан, Атырау және Маңғыстау облыстарында жаңбыр жауып, күн күркірейді, кей жерлерде қатты жауын-шашын күтіледі. Жел күшейіп, екпіні 15-20 м/с дейін жетеді. Түнгі және таңғы уақытта тұман түсуі ықтимал.
Ақтөбе облысының кей бөліктерінде аздаған жаңбыр жауады. Ал Қостанай, Солтүстік Қазақстан, Павлодар, Қарағанды, Ұлытау, Шығыс Қазақстан және Абай облыстарында жауын-шашынсыз ауа райы сақталады. Бұл өңірлерде түнгі және таңғы уақытта тұман түсуі мүмкін, кей жерлерде көктайғақ байқалады.
Қызылорда облысының солтүстігі мен орталығында өткінші жаңбыр жауып, күн күркіреуі ықтимал. Ал Жамбыл облысының таулы аймақтарында жауын-шашын болжанып, кей жерлерде жел күшейіп, шаңды дауыл тұрады.
Жалпы, ел аумағында көктемгі жылы ауа райы сақталғанымен, батыс және оңтүстік өңірлерде тұрақсыздық байқалып, жауын-шашын мен желдің күшеюі болады.
