Еліміздің энергетикалық қауіпсіздігінің негізі болып табылатын көмір өнеркәсібінде оң динамика байқалады. Энергетика министрі Ерлан Ақкенженов Үкімет отырысында Қазақстанның көмір қоры бойынша әлемдегі үздік ондыққа кіретінін мәлімдеді, – деп хабарлайды 7-su.kz ақпарттық порталы.
Министрдің айтуынша, Қазақстан аумағында 33,6 млрд тонна көмір қоры шоғырланған. Егер өндіріс қазіргі қарқынмен жалғаса берсе, бұл байлық еліміздің қажеттілігін 300 жылдан астам уақыт бойы өтей алады. Бүгінде қара алтын өндірісінің негізгі ошақтары мына өңірлерде орналасқан:
-
Орталық Қазақстан: Қарағанды көмір бассейні, Торғай бассейні, Шұбаркөл және Жалын кен орындары.
-
Солтүстік-Шығыс өңірі: Екібастұз және Майкүбі бассейндері, Қаражыра кен орны.
Көмір өнеркәсібі тек ішкі нарықты ғана емес, сыртқы сұранысты да табысты қамтамасыз етіп отыр. 2025 жылдың қорытындысы бойынша өндіріс 115,9 млн тоннаға жетіп, 2024 жылмен салыстырғанда 7% өсім көрсетті. Өндірілген өнімнің 85,9 млн тоннасы еліміздің электр станцияларына, коммуналдық және өнеркәсіптік секторларына бағытталса, 30 млн тоннасы экспортқа шығарылды.
Қазақстандық көмірді тұтынатын негізгі елдердің қатарында Ресей, Польша, Өзбекстан, Түркия, Үндістан және Малайзия бар.
Энергетика министрлігі алдағы уақытта өндіріс көлемін одан әрі ұлғайтуды көздеп отыр.
«2026 жылы 128,9 млн тонна деңгейінде көмір өндіру жоспарланады», – деп атап өтті Ерлан Ақкенженов.
Бұл көрсеткіш еліміздің тек шикізат экспорттаушы ғана емес, өңірлік энергетикалық тұрақтылықты сақтаушы ретіндегі рөлін нығайта түспек. Мамандардың пікірінше, көмір өндірісінің артуы жаңа жұмыс орындарының ашылуына және моноқалалардың экономикалық әлеуетінің көтерілуіне тікелей әсер етеді.
