Бүгінде Жетісу облысының орталығында жастардың кедергісіз білім алуына бар жағдай жасалуда. Осыған байланысты жыл санап Талдықорған қаласындағы жаңадан салынған мектептер саны артып, ескі білім шаңырақтары жаңартылуда.
Мамандардың мәліметінше, қазіргі уақытта Талдықорған қаласында 30 орта мектеп бар. Онда 36 мыңға жуық оқушы білім алады. Өткен жылы қалаға қарасты Ынтымақ ауылында заман талабына сай 1200 орынды мектеп тұрғызылып қолданысқа беріліп, ұзақ уақыттан бері қалаға қатынап оқитын оқушылардың мәселесі оң шешімін тапқан. Ал, биылғы жылы облыс орталығындағы «Білім-инновация» лицейі үшін 300 орынды заманауи үлгідегі жаңа білім ордасы салынады. Бұл ондағы жаратылыстану бағыты бойынша білім алып жатқан дарынды оқушыларға зор қолдау. Аталған білім лицейінің ірге тасы өткен ғасырдың 70-ші жылдары қаланып, бүгінгі күні ғимарат әбден ескірген. Бұдан бөлек, қазір шаһардағы «Оңтүстік-Батыс», «Құлагер» шағын аудандарынан әрбірі 1200 орынды екі мектеп салу жобасы әзірленсе, «Батыс» тұрғын ауданынан демеушілер есебінен тағы бір 1200 орынды мектептің құрылысы басталмақ.
– Бұл жобалар Талдықорған қаласының білім инфрақұрылымын жаңартып, оқушылардың сапалы білім алуына мол мүмкіндік сыйлайды. Жаңа мектептер қаланың дамуымен өңірдегі білім беру сапасын арттыруға тың серпін береді. Еске сала кетсек, өткен жылы қала бойынша 1327 оқушы мектеп бітірсе, оның 46-сы «Алтын белгі», 79-ы «Үздік аттестат» иегері атанған. Осының барлығы аймақтағы білім сапасын жоғарылату бағытында жасалып жатқан тыңғылықты жұмыстардың нәтижесі,– дейді жауаптылар.
Айдын КӘЛІМХАН
