Панфилов ауданы тағы бір игі бастаманың ұйытқысына айналды. “Taza Qazaqstan” экологиялық акциясы аясында ұйымдастырылған кең көлемді сенбілік жұмысына жұрт бір адамдай жұмылды. Сондай-ақ, облыстық “7 ozen” экоакциясы шеңберінде Іле өзенінің бойы да назардан шет қалмады, – деп хабарлайды 7-su.kz ақпараттық порталы.
Аудан көлемінде де қарқын бәсеңдеген жоқ. Республикалық және облыстық маңызы бар жол бойлары, әлеуметтік нысандардың айналасы, саябақтар мен халық тынығатын орындар тазартылды.
Жалпы алғанда, тазалық жұмыстарына 2000-нан астам тұрғын белсенді түрде қатысып, нәтижесінде 100 тоннаға жуық қоқыс сыртқа шығарылды. Бір күннің ішінде 1700 түп ағаш егілсе, жыл басынан бері өңірде 7000-ға жуық әртүрлі көшет отырғызылған.
Тағы бір атап өтерлігі, бұл игі істен кәсіпкерлер де шет қалған жоқ. Әр сенбі сайын сенбілікке шыққан тұрғындарға ауыз су мен қажетті құрал-жабдықтар ұсынып, көпшілікке қолдау білдіруде. Осындай жанашырлықтың бір үлгісін көрсеткен кәсіпкер Жансая Ақанова:
– Демалыс күндері тұрғындар мен түрлі мекеме қызметкерлері аудан тазалығы үшін аянбай еңбек етеді. Кейде өзгенің қалдырған қоқысын жинап жүргендерін көресің. Сол еңбекті көргенде бейжай қалу мүмкін емес. Ауа райының ыстығы мен қолайсыздығына қарамастан тазалыққа үлес қосып жүрген жандарға аз да болса қолдау білдіргім келді, – дейді ол.
Иә, тазалық сенбілікпен шектелетін науқаннан бөлек, ол әр адамның ішкі мәдениетінің айнасы, туған жерге деген құрметінің өлшемі. Панфилов ауданындағы бұл бастама – ел ішіндегі ынтымақ пен жауапкершіліктің айқын дәлелі. Осындай игі істер үздіксіз жалғасын тапқанда ғана табиғат та, қоғам да жаңғыра түсері анық.
