АҚШ президенті Дональд Трамптың Ормуз бұғазын қоршауға алу туралы мәлімдемесінен кейін әлемдік мұнай нарығында күрт өсім байқалды, – деп хабарлайды 7-su.kz ақпараттық порталы.
Лондонның ICE биржасындағы сауда-саттық деректеріне сәйкес, Brent маркалы мұнайдың маусымдық фьючерстері 7,27 пайызға қымбаттап, барреліне 102 доллардан асты (Астана уақыты бойынша сағат 08:00-дегі көрсеткіш). Ал WTI маркалы мұнайдың көктемгі фьючерстері 8,55 пайызға өсіп, барреліне 104,83 долларды құрады.
Бағаның көтерілуіне АҚШ пен Иран арасындағы келіссөздердің нәтижесіз аяқталуы әсер етті. 11 сәуір күні Исламабадта басталған келіссөздер ұзаққа созылғанымен, тараптар ортақ шешімге келе алмады. АҚШ вице-президенті Джей Ди Вэнс келіссөздердің сәтсіз аяқталғанын мәлімдеді. Осыдан кейін америкалық делегация елге оралған.
Келіссөздерден кейін Дональд Трамп АҚШ Ормуз бұғазы арқылы өтетін кемелерді бұғаттауды бастайтынын хабарлады. Оның айтуынша, АҚШ Әскери-теңіз күштері бұл бағыттағы кемелерді бақылауға алып, олардың Иранға өту үшін ақы төлеген-төлемегенін тексереді.
Сарапшылардың пікірінше, мұнай бағасының өсуі Қазақстан экономикасына екіжақты әсер етеді. Мұнай-газ саласының сарапшысы Асқар Исмаиловтың айтуынша, бағаның қымбаттауы бюджет кірісін арттырып, Ұлттық қорды толықтыруға мүмкіндік береді, сондай-ақ сауда балансын жақсартып, теңге бағамын қолдайды.
Алайда мұнай нарығындағы тұрақсыздық экономикалық тәуекелдерді де күшейтеді. Бағаның құбылуы инфляция деңгейіне, инвестициялық ахуалға және қаржы нарықтарының тұрақтылығына кері әсер етуі мүмкін. Қазақстан экономикасының мұнайға тәуелділігі сыртқы факторларға сезімталдықты арттыра түседі.
Айта кетейік, 2026-2028 жылдарға арналған республикалық бюджетте мұнай бағасы барреліне 60 доллар, ал доллар бағамы 540 теңге деңгейінде болжанған. Бұл көрсеткіштер экспорттық кірістерді, әлеуметтік төлемдерді және мемлекеттік шығыстарды жоспарлау кезінде негізге алынған.
