Жетісу өңірінде ғылым мен білімнің өркендеуіне сүбелі үлес қосқан ғалым-ұстаз Қарлығаш Сарбасованың құрметіне орай оқушылар арасында дәстүрлі «Til Daryn» инновациялық жобалар байқауы өтті. Ғылым онкүндігі аясында ұйымдастырлыған шарада ғалым атындағы лингводидактикалық зертхана салтанатты түрде ашылды.
Ауқымды жиынға отандық жоғары оқу орындарының жетекші ғалымдары, тіл білімі саласының мамандары, тіл жанашырлары, университеттің профессор-оқытушылар құрамы, сондай-ақ, мектеп мұғалімдері мен оқушылары қатысты. Салтанатты сәтте ғалым-ұстаз Қарлығаш Сарбасованың ғылым мен білімге қосқан сүбелі үлесі ерекше аталып, оның ғылыми мұрасын дәріптеу мен жалғастырудың маңыздылығы кеңінен сөз болды.
Зертхананың материалдық-техникалық базасының жасақталуына ардагер-ұстаздың отбасы демеушілік көрсетіп, бұл игі іс білім мен ғылымды қолдаудың жарқын үлгісіне айналды.
Шара барысында І. Жансүгіров атындағы Жетісу университетінің ректоры Ермек Бөрібаев құттықтау сөз сөйлеп, жаңа зертхананың болашақ филолог мамандарды даярлаудағы, тілдік білім беру сапасын арттырудағы және заманауи лингводидактикалық технологияларды оқу үдерісіне енгізудегі маңызын атап өтті.
Осы игі істің заңды жалғасы ретінде өткен «Til Daryn» инновациялық жобалар байқауы жас зерттеушілердің шығармашылық әлеуетін шыңдап, тіл үйрену үдерісіне тың серпін берді. Байқаудың басты мақсаты – филология саласындағы инновациялық жобаларды қолдау, заманауи технологияларды тіл үйренуге тиімді енгізу, жас ғалымдардың ізденісін ынталандыру.
Биыл байқауға облыстың Алакөл, Сарқан, Ескелді аудандары мен Талдықорған қаласынан 12 жоба ұсынылып, олардың әрқайсысы өзекті тақырыптарды қамтыды. Қазылар алқасының шешімімен үздіктер анықталып, жеңімпаздар марапатталды.
Сайыс қорытындысы бойынша І орын Інжу Жаскленге, ІІ орын Мұқағали Рахымғазы мен Дәрмен Дастанұлына, ІІІ орын Нариман Алимұратқа бұйырды. Жеңімпаздар қаржылай сыйлықпен марапатталды. Сондай-ақ, байқауда арнайы номинациялар бойынша да үздіктер анықталды. «Үздік цифрлық жоба» номинациясын Әлихан Жәнібек, Айым Бауыржан және Асылназ Сұлтанбек еншіледі. Ал «Үздік әдістемелік жоба» атағын Рахима Ділмұрат пен Дулат Тлеуберді иеленді. «Үздік әдеби-шығармашылық жоба» номинациясында Алинұр Есетов топ жарса, «Үздік креативті жоба» бойынша Санжана Ерланова үздік деп танылды. «Үздік тілтанымдық жоба» номинациясы Айзере Мұраттың еншісіне тиді.
Байқауға қатысқан барлық жас зерттеушіге Алғыс хаттар мен естелік сыйлықтар табысталып, олардың ғылымға деген қызығушылығы мен ізденісі жоғары бағаланды.
– Бұл жоба бізге қазақ тілін сапалы үйренуге үлкен мүмкіндік берді. Қазіргі таңда оқушылар арасында өзге тілде сөйлеп, өзге тілде ойлау белең алып барады. Біздің басты мақсатымыз – замандастарымыздың ана тілінде еркін әрі сауатты сөйлеуіне жағдай жасау, – дейді жобаға қатысушы Мұқағали Рақымғазы.
Жалпы, бұл шара – тіл ғылымына құрметтің, ұстаз еңбегіне тағзымның және жас ұрпақтың білімге деген ұмтылысын қолдаудың айқын көрінісі. Жаңа зертхананың ашылуы мен «Til Daryn» байқауы өңірдегі ғылым мен білімнің дамуына тың серпін беретіні сөзсіз.
Медет ЖҰМАБАЙ
