Қазақстанда арнайы техниканың өтуіне кедергі келтіріп, көлігін бейберекет қалдыратын жүргізушілерге қатысты шаралар қатаңдатылуда. Ереже бұзғандар үшін 10 АЕК мөлшерінде, яғни 43 250 теңге айыппұл қарастырылған, – деп хабарлайды 7-su.kz ақпараттық порталы NewTimes.kz агенттігіне сілтеме жасап.
Көлікті хаотичті түрде тұраққа қою мәселесі көпқабатты үйлердің ауласында әлі де өзекті болып отыр. Кіреберіс алдына немесе тар жолдарға қойылған автокөліктер өрт сөндіру машинасының, жедел жәрдемнің және басқа да арнайы техниканың өтуін қиындатады. Шығыс Қазақстан облысының Төтенше жағдайлар департаменті өрт қауіпсіздігі ережелерінің 164-тармағына сәйкес, ғимараттар мен сыртқы сатыларға баратын жолдар әрдайым бос және техника өтуіне қолжетімді болуы тиіс екенін ескертеді.
Жолдың бөгелуі құтқарушылардың жұмысына айтарлықтай кедергі келтіреді:
-
Оқиға орнына жедел жету мүмкін болмайды;
-
Адамдарды эвакуациялауға арналған автосатыларды орнату қиындайды;
-
Өртті сөндіруге қажетті жауынгерлік өрістету жұмыстары кешігеді.
Бұл мәселенің қаншалықты маңызды екенін жақында Астанада болған қайғылы оқиға көрсетіп берді. Елордадағы өрт кезінде дұрыс тұраққа қойылмаған көліктің кесірінен өрт сөндірушілер аулаға 20 минут бойы кіре алмаған. Осы алтынға бергісіз уақыт ішінде үш бала қаза тауып, анасы ауыр күйікпен ауруханаға түсті. Бұл оқиғадан кейін жолды бөгеген Hyundai автокөлігінің иесіне 43 мың теңгеден астам айыппұл салынды.
Көлік иелерін әкімшілік жауапкершілікке тарту ҚР Әкімшілік құқық бұзушылық туралы кодексінің 597-бабы 3-бөлігі бойынша жүзеге асырылады. Басқа көліктердің қозғалысына кедергі келтіретіндей етіп тоқтау немесе тұраққа қою ережелерін бұзу тікелей айыппұл арқалауға соқтырады.
Мамандар көлік иелеріне темір тұлпарларын қауіпсіз, белгіленген орындарға қоюды және төтенше жағдай кезінде кедергі келтірмеуін қадағалауды сұрайды. Кейде 5 минутқа қалдырылған көлік біреудің өмірін сақтап қалуға кедергі болуы мүмкін.
