Сенат төрағасы Мәулен Әшімбаев Қазақстанда вице-президенттің қашан тағайындалатыны туралы сауалға жауап берді, – деп хабарлайды 7-su.kz ақпараттық порталы.
Оның айтуынша, бұл мәселе жаңа Парламент – Құрылтай жасақталғаннан кейін шешіледі. Жаңа Конституцияға сәйкес, вице-президентті Президент Құрылтайдың келісімімен тағайындайды.
– Бұл сұрақтың бәрі Мемлекет басшысының құзырында. Мұның бәрі жалпыхалықтық референдумда қабылданған Конституциямен реттеледі. Жаңа Құрылтай сайланғаннан кейін Президент тиісті шешім қабылдайды. Бұл мәселелер Конституциямызда нақты жазылған, – деді Мәулен Әшімбаев.
Айта кетейік, вице-президент институты жаңа Конституцияда бекітілген. Қаңтар айында өткен Ұлттық құрылтайдың V отырысында Президент Қасым-Жомарт Тоқаев вице-президентті Мемлекет басшысы өзі тағайындайтынын мәлімдеген болатын.
Жаңа Конституция 2026 жылғы 1 шілдеден бастап күшіне енеді. Ал Құрылтай сайлауы тамыз айына жоспарланған.
