«Алтын-Емел» мемлекеттік ұлттық табиғи саябағы маңындағы үш ауылда мектеп орманшылығы ашылады.
Бұл мектеп оқушыларының орман қорын ұлғайтуға көмектесетінін білдіреді. «Таза Қазақстан» акциясы аясында Басши ауылында ұлттық саябақ қызметкерлері ағаштың бес түрін отырғызуды ұйымдастырды. Олардың өсіп-жетілуіне балалар қамқорлық жасайды. Содан кейін көшеттер ауылдағы бақтарға отырғызылады. Ұлттық саябақ мамандарының айтуынша бұл биылға жоспарланған іс-шаралардың алғашқысы. Мектеп оқушылары экологиялық акция, экскурсия және сенбіліктерге қатысуды жалғастырады. Ал көктемде тағы 600 ағаш отырғызылады деп күтіліп отыр.
– Осы ауылдық округке қарасты үш ауылда мектеп орманшылығын ашу жоспарда бар. Мектеп орманшылығы негізінен ағаш отырғызу, табиғатты қорғау сияқты экологиямен байланысты кез келген іс-шарамен айналысады. Оған мектеп пен ұлттық саябақ басшылығы тікелей жетекшілік етеді. Яғни, бұл бірлескен жұмыс болады,– дейді «Алтын- Емел» мемлекеттік ұлттық табиғи саябағы бөлімінің басшысы Адай Омархан.
Осыған байланысты мектеп оқушысы Ақерке Байтулақова еліміздің әрбір тұрғыны өзінің кіші Отанының экологиясы мен көгалдандыруын жақсарту ісіне өз үлесін қосады деп санайтынын және олардың отырғызылған ағаштарды өсіре алатындарына сенімді екенін, себебі ол ауылды көркейтуге ықпал ететінін айтып, ойын түйді.
Айгүл Байжұмақызы
Кербұлақ ауданы
Фото: Видеодан алынған кадр
