Қазіргі таңда ауа райының құбылуы, атап айтқанда қар жаууы, боран мен көктайғақ республикалық және жергілікті маңызы бар автожолдардағы қозғалысты қиындатуы ықтимал, – деп хабарлайды 7-su.kz ақпараттық порталы.
Төтенше жағдайларға жедел ден қою үшін ТЖМ қызметкерлері арнайы автокөліктердің техникалық жай-күйін, қажетті құтқару жабдықтары мен тұрақты байланыс құралдарын жан-жақты тексеруден өткізуде. Қысқы маусымға әзірлік барысында жолсыз жерлерде жүретін техникалардың дайындығы ерекше назарға алынған.
Мәселен, жолсыз аумақтарда құтқарушылардың сенімді көмекшілерінің бірі – ТЖД жедел-құтқару жасақтарының жарағында тұрған «ТРЭКОЛ» жол талғамайтын көлігі. Аталған техниканың басты артықшылығы – жоғары өтімділігі. Төмен қысымды арнайы дөңгелектерінің арқасында көлік қалың қар басқан учаскелерде, ойлы-қырлы жерлерде және қарапайым жеңіл көліктердің жүруі мүлде мүмкін емес қиын жолдарда емін-еркін қозғала алады. Мұндай арнайы техника әсіресе қыс айларында, қатты боран мен қарлы үйінділер салдарынан автожолдардың жекелеген учаскелеріне жету қажет болған кезде аса қажет.
Мамандардың айтуынша, техниканы қысқы маусымға дайындау жұмыстары тек бір реттік тексерумен шектелмейді. Көліктердің жарамдылығы мен кез келген уақытта шақыртуға шығуға әзірлігін қамтамасыз ету құтқару бөлімшелерінің күнделікті атқаратын маңызды жұмысының қатарына кіреді. Арнайы міндеттерді орындап келгеннен кейін автокөліктер толықтай тексеріліп, барлық жабдықтардың жай-күйі қатаң бағаланады. Қажеттілік туындаған жағдайда шұғыл түрде техникалық қызмет көрсету және анықталған кішігірім ақауларды жою жұмыстары жүргізіледі.
Қысқы боран кезінде автожолдарда қауіпті қар үйінділері жиі пайда болады. Осындай сын сәттерде құтқару техникасының сақадай сай тұруы адам өмірін аман алып қалуға тікелей әсер етеді. ТЖМ аумақтық бөлімшелері қолайсыз ауа райынан туындайтын төтенше жағдайларды жою мақсатында барлық күштер мен құралдардың дайындығын қамтамасыз етуде.
