Заман дамып, полиция қанша қырағы болған сайын қылмыстың түрі көбейіп кетті. Тіпті адам баласының қиялы жете бермейтін қылмыс түрлері пайда болуда. Қылмыстың алдын алу, ашу бойынша Көксу ауданында қандай шаралар атқарылды? Мақалаға зер салайық.
Аудандық полиция бөлімінің мәліметінше былтырғы жылдың қорытындысы бойынша өңірде қылмыс саны 2023 жылмен салыстырғанда 200-ден 168-ге төмендеген. Жалпы қылмыстың ашылу көрсеткіші 82,8% пайызды құрап, 2023 жылмен салыстырғанда жоғарылап тұр. Оның бір себебі аудандағы үш ауыл Жарлыөзек, Еңбекші ауылдық округіне қарасты Кеңарал, Мұқаншы ауылдық округіне қарасты Жетіжал ауылдары ішімдіктен түбегейлі бас тартқан. Соңғы бес жылда осы үш ауылда ешқандай қылмыс тіркелмепті.
– Үлгілі ауылдардың қатарында тұрған 3 ауылда да спирттік ішімдік сатылмайды. Соның нәтижесінде ол жақта бірде бір қылмыстық іс тіркелмеді. Мұндағы жастардың басым бөлігі спортпен шұғылданып, өнерге бет бұрған, – дейді Көксу ауданы полиция бөлімінің бастығы, полиция майоры Ернар Қалтаев.
Әйтсе де, ауданда алаяқтықтың алдын алу мүмкін болмай тұр. Цифрлық технология дамыған сайын, қылмыс та түрленіп барады. Полиция қызметкерлері кейінгі кезде елді қарусыз тонап жүргендер көбейіп кеткенін айтып шырылдауда. Ауданда бұл қылмыстың түрі 31-ден 58-ге дейін жеткен.
Жұртшылықты алаңдатып отырған қылмыс түрі – мал ұрлығы. Жыл қорытындысы бойынша бұл қылмыстың саны азайыпты.
– Талдау жүргізу барысында мал ұрлығы көбінесе жайылымнан кетіп жатыр, арызданушылар дер кезінде полиция бөліміне жүгінбегендіктен малдарды тез арада табуға және қылмысты дер кезінде ашуға қиындық туғызады, – дейді полиция бөлімінің бастығы.
Мал ұрлығын алдын-алу мақсатында, Көксу ауданының аумағында 11 тұрақ бекітіліпті. Атап айтқанда, Балпық би, Айнабұлақ, Алғабас, Мұқыры, Лабасы, Еңбекші, Жарлыөзек, Мұқаншы, Мұсабек ауылдық округтерінде және отгондық учаскеслерінде орналасқан. Олар бойынша ауылдық округтердінің әкімдері және шаруа қожалықтың иелері арасында меморандум әзірленген. Қараусыз жүрген малдардың иелеріне 2024 жылы барлығы 181 әкімшілік құқықбұзушылық анықталып, мал иелеріне барлық дерек бойынша айыппұл салынған. Көксу ауданы бойынша барлығы 417 жеке шаруа қожалығы бар. Учаскелік полиция инспекторларына өздеріне бекітілген аумақтарында жеке шаруа қожалықтарын, қыстаулармен жайылымдарды аралап, қараусыз жүрген мал иелеріне малдарды қараусыз қалдырмау бойынша түсіндіру жұмыстары жүргізілуде. 2024 жылдың 12 айында іздеуде жүрген 4 қылмыскер ұсталды.
Заман ағымын зулаған көлік құралынсыз елестету әсте мүмкін емес. Бірақ кейінгі кезде сол темір тұлпардың салдарынан жол апаты жиілеп барады. Көксу ауданында былтыр 64 жол көлік апаты орын алды. Салдарынан 15 адам қайтыс болса, 119 адам жарақат алды. Былтыр 2960 жол ережелесін бұзу дерегі анықталды. Оның ішінде автокөлікті мас күйінде жүргізгені үшін 28 адам ұсталып, әкімшілік жауапкершілікке тартылды.
Қайғылы жағдайды азайту үшін заң бұзушылықтарды анықтайтын бейнебақылау камералар көбейтіліп, заң күшейтіліп жатыр. Десе де темір тұлпар тізгіндеген әр адам өзінің және өзгенің өміріне жауапты екенін жадынан шығармағаны абзал.
Айдар ҚАЛИЕВ
Фото: ЖИ-ға тапсырыс берген 7-su.kz
