Өңірлік коммуникациялар қызметінің ақпарат алаңында Жетісу облысының санитариялық-эпидемиологиялық бақылау департаменті мен денсаулық сақтау басқармасы өкілдерінің қатысуымен баспасөз мәслихаты өтті. «Иммундау апталығы» аясында ұйымдастырылған жиында мамандар екпеден бас тартудың қауіпті салдары мен ұжымдық иммунитеттің жай-күйі туралы сөз қозғады.
Санитариялық-эпидемиологиялық бақылау департаментінің басшысы Асхат Чарапиев иммунопрофилактика ұғымына кеңінен тоқталды. Оның айтуынша, вакцинациялау арқылы белгілі бір иммунитетті қалыптастыруға және инфекциялардың халық арасында таралуын болдырмауға бағытталған.
Елімізде вакцинация мәселесі «Халық денсаулығы және денсаулық сақтау жүйесі туралы» Кодекспен және Үкіметтің тиісті қаулыларымен қатаң реттеледі. Біз қолданатын вакциналар – туберкулез, В гепатиті, көкжөтел, дифтерия, сіреспе, полиомиелит және қызылша сияқты аса қауіпті дерттерден қорғайтын сенімді құрал, – деді Асхат Чарапиев.
Спикер өз сөзінде вакцинацияның тарихи жеңістерін мысалға келтірді. Соның ішінде 1977 жылдан бері әлемде шешек ауруының толық жойылғанын, ал Қазақстанның «полиомиелиттен бос ел» мәртебесіне ие болғанын ерекше атап өтті. Өңірдегі эпидемиологиялық ахуал туралы айтқан департамент басшысы соңғы жылдары кейбір инфекциялардың қайта бас көтергенін тілге тиек етті. Мәселен, 2023 жылы облыста қызылшаның 576 жағдайы тіркелсе, 2024 жылы бұл көрсеткіш 727-ге жеткен. Сондай-ақ, көкжөтелдің 177 жағдайы да есепке алынған. Ең өкініштісі, қызылшамен ауырғандардың 80 пайызы бірде-бір екпе алмаған. Ал, көкжөтел жұқтырғандардың 92 пайызы ата-анасы екпе салдырмаған балалар.
Сырқаттанушылардың өсу себебі – ұжымдық иммунитеттің төмендеуі. Халықтың басым бөлігі жеке көзқараспен, діни сеніммен, ал кейбірі әлеуметтік желіге тараған жаңсақ ақпаратқа сеніп, вакцинадан бас тартып отыр. Бұл – өте қауіпті үрдіс, – деген Асхат Чарапиев аурудың өсу себептерін түсіндірді.
Жетісу облысы денсаулық сақтау басқармасы басшысының орынбасары Сымбат Кульбаева Қазақстандағы вакцинация жүйесінің тиімділігіне тоқталды. Оның айтуынша, елімізде 21 инфекцияға қарсы екпе мемлекет есебінен тегін жүргізіледі. Салыстырмалы түрде айтсақ, Африка мен Оңтүстік Американың көптеген елдерінде бұл екпелер ақылы. Спикер балалардың иммунитеті әлсіз кезде егілуі тиіс маңызды екпелерді атап өтті:
- Алғашқы 1-4 күн: Туберкулез (БЦЖ) және В гепатиті.
- 2, 3, 4 айлығында: Кешенді вакцинация (көкжөтел, дифтерия, сіреспе, полиомиелит, Хиб және пневмококк).
- 12-15 айлығында: Қызылша, қызамық, паротит (КПК).
- 11 жаста: Адам папилломавирусына (АПВ) қарсы вакцинация (қыздар үшін жатыр мойны обырының алдын алу).
Мамандар екпеден бас тартудың нақты медициналық салдарын тізбектеп берді. Мәселен, қызылша – соқырлыққа, кереңдікке және мидың қабынуына әкелсе, дифтерия – жүрек пен бүйректі зақымдайды. Ал, сіреспе бұлшықеттердің ауыр құрысуы мен сүйектің сынуына әкеледі.
Вакцинацияланбаған бала тек өзін ғана емес, айналасындағы адамдарды да қауіпке тігеді. Дүниежүзілік денсаулық сақтау ұйымының дерегінше, иммундау жыл сайын әлемде 3,5 миллионнан 5 миллионға дейін адам өмірін аман сақтап қалады, – деп атап өтті Сымбат Кульбаева.
Бүгінде Жетісу облысында жыл сайын 40 мыңнан астам бала иммундаумен қамтылады. Алайда, жыл сайын 500-ге жуық бала түрлі себеппен екпе алмай қалады. Мамандар ата-аналарды тек ресми ақпарат көздеріне сенуге шақырды.
Вакцина туралы толық және сенімді ақпаратты egu.kz сайтынан алуға немесе 7701 жедел желі телефонына хабарласып, білікті мамандардан кеңес алуға болады.
Мақпал Әділханқызы
