Қазақстанда мемлекеттік қызметшілердің әлеуметтік пакеті нығайтылып, еңбек жағдайлары айтарлықтай жақсармақ, – деп хабарлайды 7-su.kz ақпараттық порталы.
Сенат депутаттары «Қазақстан Республикасының мемлекеттік қызметі туралы» жаңа заң жобасын мақұлдады. Бұл құжат 2024-2029 жылдарға арналған мемлекеттік қызметті дамыту тұжырымдамасының аясында әзірленген. Реформаның басты мақсаты – мемлекеттік аппараттың тиімділігін арттыру, білікті мамандардың тапшылығын жою және азаматтардың мемлекеттік органдарға деген сенімін нығайту.
Жаңа заңдағы ең маңызды жаңалықтың бірі – көлденең мансаптық өсу тетігі. Енді маман міндетті түрде басшылық лауазымға ауыспай-ақ, өз орнында отырып табысын арттыра алады. Бір лауазым шеңберінде еңбекақысы әртүрлі төрт деңгей белгіленген. Қызметшінің жоғары деңгейге өтуі оның жұмыс нәтижесін бағалау, біліктілігін арттыру және тағылымдамадан өту қорытындысына тікелей байланысты.
Сонымен қатар заңнамалық деңгейде мемлекеттік қызметшілердің жалақысын кемінде үш жылда бір рет міндетті түрде индекстеу нормасы бекітілді. Бұл шара инфляция жағдайында мамандардың сатып алу қабілетін сақтауға мүмкіндік береді.
Мемлекеттік секторда ұзақ жыл еңбек еткен қызметкерлер үшін ынталандыру пакеті кеңейтілді. Енді мемлекеттік қызмет өтіліне қарай негізгі демалысқа қосымша ақылы күндер қосылады:
- 10 жылдан асқан еңбек өтілі үшін – 3 күн;
- 15 жылдан бастап – 5 күн;
- 20 жылдан жоғары еңбек өтілі барларға – 10 күн.
Бұдан бөлек, қызметкерлер отбасылық жағдайларына байланысты 10 күнтізбелік күнге дейін қысқамерзімді ақылы демалыс алу құқығына ие болды.
Реформа аясында ротацияға іліккен немесе басқа өңірге ауысқан мамандарға көтерме жәрдемақы беріліп, көшу шығындары толық өтеледі. Ал 25 жылдан астам еңбек өтілі бар және марапаттарға ие ардагер қызметкерлер зейнетке шыққанда 4 айлық жалақы көлемінде біржолғы сыйақы алады.
Заңда мемлекеттік қызметшілердің құқықтарын қорғау мәселесі де ескерілген. Егер маман заңсыз жұмыстан босатылса немесе лауазымы негізсіз төмендетілсе, қайта қалпына келтіру кезінде оған 6 айдан аспайтын кезең үшін толық жалақысы немесе айырмасы төленеді.
Бұл өзгерістер мемлекеттік қызметтің тартымдылығын арттырып, кәсіби кадрларды ұстап қалуға бағытталған маңызды қадам. Білікті мамандардың тұрақтауы мемлекет ұсынатын қызметтердің сапасын жақсартып, халықтың қажеттіліктерін жедел шешуге септігін тигізеді.
