«Қазгидромет» синоптиктері 2 мамырға арналған ауа райы болжамын жариялады. Мамандардың мәліметінше, еліміздің басым бөлігінде тұрақсыз ауа райы сақталады, – деп хабарлайды 7-su.kz ақпараттық порталы.
Республика бойынша жаңбыр жауып, кей өңірлерде найзағай ойнайды. Сонымен қатар, бұршақ түсіп, желдің күшеюі күтіледі. Ал оңтүстік аймақтарда ауа температурасы +32 градусқа дейін көтеріліп, күн айтарлықтай ысиды.
Атап айтар болсақ, Жетісу облысында батыс, оңтүстік және таулы аудандарда өткінші жаңбыр жауып, найзағай ойнайды. Кей жерлерде бұршақ жауып, дауыл соғуы мүмкін.
Жел оңтүстік-шығыстан соғып, кейін солтүстік-шығысқа ауысады. Оның жылдамдығы секундына 9-14 метрді құраса, солтүстік және таулы аудандарда 15-20 метрге дейін күшейеді. Алакөл көлдері маңында жел екпіні 25 метрге дейін жетуі ықтимал.
Ауа температурасы облыс бойынша түнде 10-15 градус жылы, таулы өңірлерде 5 градусқа дейін төмендейді. Күндіз 27-32 градус жылы болса, таулы аудандарда 22 градус шамасында болады.
Синоптиктер тұрғындарға ауа райының қолайсыз құбылыстарына байланысты сақ болуды ескертеді.
