«Жетісу» волейбол клубының сапында ел чемпионатының қорытындысы бойынша «Үздік шабуылшы» болған қытайлық 25 жастағы Мяо Ивэнмен тілдесудің сәті түсті. Мяо маусым аяқталғаннан кейін өз еліне оралып, сол жақта мансабын жалғастырады. Аз уақыт ішінде Қазақстан чемпионатында нәтижелі ойынымен көзге түсіп, «Жетісу» командасымен бірге Бразилияда өткен клубтар арасындағы Әлем чемпионатына, Тайландта болған Азия чемпиондар лигасына қатысты.
– Маусымды қорытындыласақ. Қандай баға бересіз?
– Әуелі бапкерлерге және командадағы әріптестеріме алғыс айтамын. Олардың қамқорлығы, қолдауы өз үйімде жүргендей еркіндік сыйлап, ерекше сезімге бөледі. Біз үшін ғажайып маусым болды деп есептеймін. Әрине, маусым ішінде қуанышта, қиындықта болды, алайда біз бір-бірімізбен септесе отырып, нағыз командалық ойын көрсетіп, өз қалауымыздағы нәтижеге қол жеткіздік. Бұл маусымда психологиялық тұрғыдан өсіп, техникалық жағынан өзімді дамытып, ойынды жете түсіндім. Сондықтанда бұл маусымның мен үшін орны бөлек болады.
– Қазақстан қай тұсымен есте қалды? Қонақ есебінде қайтып келесіз бе?
– Мен бұл жерге қыста келдім, сол кезде басқаша картинаны көрдім. Айнала әдемі болып ақ үрпекке оранып жатты. Ал жергілікті тұрғындар өте жанашыр, достықтарын ұсынып, көмектесуге әзір тұрады. Тарихы терең елдің мәдениетімен толық танысқым келеді. Әдемі жерлерін көрсем деймін. Мен Қазақстанға өз отбасымды алып міндетті түрде қонақ болып келемін.
– Командаға оралсақ. «Жетісу» волейбол клубының бапкерлер құрамы, ойыншылары жөнінде не айтасың?
– Керемет! Бас бапкер Марко Гршич мені үнемі қолдап, қанаттандырып отырды. Ал командадағы қыздар өте керемет. Бәрімен бір үйдің балаларында араластық. Команданың атмосферасы күшті. Дәл осы қарқынмен «Жетісу» жеңісті жолын жалғастыруы керек. Мен «Жетісудың» болашағына сенемін.
– Сұхбатыңызға рақмет!
Серік ҚАНТАЙ
