Көктем мен жаз мезгілінде ауыл шаруашылығына үлкен қауіп төндіретін зиянкестердің бірі – шегіртке.
Әсіресе, егістік алқаптарына шабуыл жасаған кезде өнім көлемін азайтып, шаруаларға орасан шығын келтіреді. Сондықтан шегірткеге қарсы күрес жұмыстары жыл сайын ерекше бақылауға алынып келеді. Зиянкестердің таралуына жол бермеу мақсатында аймақта биыл да ауқымды жұмыстар жүргізілуде. Мамандар егістік және жайылымдық жерлерді тұрақты түрде бақылап, шегірткенің таралу аймақтарын анықтауда. Арнайы құрылған мониторингтік топтар күн сайын алқаптарды аралап, зерттеу жұмыстарын жүргізіп жатыр. Анықталған аумақтарда химиялық өңдеу шаралары ұйымдастырылуда.
Жұмыстарды атқару үшін арнайы техникалар мен бүрку құрылғылары қолданылып, зиянкестерге қарсы дәрі себілуде. Мамандардың айтуынша, күрес жұмыстары дер кезінде жүргізілсе, шегірткенің жаппай таралуының алдын алуға болады. Бұл өз кезегінде егіннің сақталуына және ауыл шаруашылығы өнімдерінің мол болуына мүмкіндік береді. Шаруалар да бұл іске бейжай қарамай, зиянкестер байқалған жағдайда тиісті мекемелерге хабар беріп, құлақтандырады. Бірлескен жұмыстың нәтижесінде шегірткеге қарсы күрес тиімді жүзеге асырылып келеді.
«Республикалық фитосанитарлық диагностика және болжамдар әдістемелік орталығы» республикалық мемлекеттік мекемесінің Жетісу облысы бойынша басшысы Бақберген Атантаевтың айтуынша, биыл шегіртке тектес зиянкестерге қарсы химиялық өңдеу жұмыстары 133,4 мың гектар жерде жүргізіледі, оның ішінде үйірлі шегірткелер – 91,1 мың гектар (66 018 гектар итальяндық прус, 25 061 гектар азиялық шегірке), үйірсіз саяқ шегірткелер – 42,3 мың гектар.
Бүгінде жалпы 8,4 мың гектар жерде шегіртке ошақтары (саяқ – 4,1 мың гектар, үйірлі – 4,3 мың гектар.) анықталып, 6,8 мың гектары өңделген (саяқ – 3,1 мың гектар, үйірлі – 3,7 мың гектар). Оның ішінде саяқ шегіртке ошақтары 4 аудан (Ақсу – 720 гектар, Қаратал – 350 гектар, Көксу – 320 гектар, Панфилов – 2 474 гектар,) мен Талдықорған қаласында (200 гектар) 4,1 мың гектар алқапта анықталып, 3,1 мың гектар жерде өңдеу жұмыстары жүргізілген. Ал үйірлі шегіртке ошақтары – Алакөл – 660 гектар, Қаратал – 50 гектар, Кербұлақ – 2633 гектар, Көксу – 200 гектар, Панфилов – 730 гектар, және Талдықорған қаласы – 50 гектар, барлығы 4,3 мың гектар жерде анықталып, Алакөл – 560 гектар, Кербұлақ – 2200 гектар, Көксу – 200 гектар, Панфилов – 730 гектар, Талдықорған қаласы – 50 гектар, барлығы 3,7 мың гектар алқап өңдеуден өткен.
Қазіргі кезде 100-ден аса адам зиянкестерге қарсы күрес жұмыстарын жүргізуге жұмылдырылған. Химиялық өңдеу жалпы 6 әуе ұшағы, 24 бірлік жер үсті бүріккіш техникалар күшімен іске асырылуда.
Табиғатқа зиян келтірмей, ауыл шаруашылығын қорғау – баршамызға ортақ міндет. Сондықтан шегірткеге қарсы күрес шаралары алдағы уақытта да жүйелі түрде жалғасын табады.
Айгүл БАЙБОСЫНОВА
