Жыл басынан бері жолаушылар пойыздарында қоғамдық тәртіпті бұзған 200-ден астам адам пойыздан түсірілді. Бұл туралы Көліктегі полиция департаменті мәлімдеді, – деп хабарлайды 7-su.kz ақпараттық порталы.
Ведомство дерегінше, 2026 жылдың басынан бері пойыз ішінде жасалған 255 құқық бұзушылық анықталған. Оның басым бөлігі алкогольдік ішімдіктерді шамадан тыс тұтынуға байланысты болған. Нақтырақ айтқанда, мас күйде қоғамдық тәртіп бұзудың 225 дерегі тіркелген.
Сондай-ақ пойыздарда 17 ұсақ бұзақылық фактісі анықталып, өзге де құқық бұзушылықтар бойынша шара қолданылған.
– Мәселен, Бейнеу станциясында көлік полицейлері Маңғыстау-Алматы бағытындағы жолаушылар пойызынан пойыз бастығының актісімен Қызылорда облысының 35 және 44 жастағы екі тұрғынын түсіріп алды. Аталған азаматтар вагонда алкогольдік ішімдік ішіп, балағат сөздер айтып, қоғамдық тәртіпті бұзған және өзге жолаушыларға қолайсыздық туғызған. Құқық бұзушылар қоғамдық орында алкогольдік ішімдік ішкені және ұсақ бұзақылық жасағаны үшін әкімшілік жауапкершілікке тартылып, оларға айыппұл салынды. Сондай-ақ ұсталғандардың бірінің бұған дейін де осыған ұқсас құқық бұзушылық үшін жауапкершілікке тартылғаны анықталды, – делінген хабарламада.
Полиция қызметкерлерінің айтуынша, ішімдікке мас болған жолаушылар көбіне жанжал шығарып, айналасындағыларға кедергі келтіреді. Мұндай әрекеттер жолаушылардың қауіпсіздігіне қауіп төндіріп қана қоймай, қоғамдық тәртіптің бұзылуына әкеледі.
Осыған байланысты Көліктегі полиция департаменті азаматтарды сапар барысында мәдениетті сақтауға, өзге жолаушыларға құрметпен қарауға шақырды. Ведомство өкілдері қоғамдық орында тәртіп бұзғандарға заң аясында жауапкершілік қарастырылғанын ескертеді.
Мамандардың сөзінше, теміржол көлігіндегі қауіпсіздік тек полиция жұмысына ғана емес, жолаушылардың өзара жауапкершілігі мен тәртібіне де тікелей байланысты.
