Қазіргі таңда жасанды интеллект технологиялары қоғамның барлық саласына қарқынды еніп келеді. Әсіресе білім мен ғылым кеңістігінде оның мүмкіндіктері күн сайын артып, жаңа бағыттардың дамуына жол ашуда. Осы тұрғыда AI SANA жобасы – студенттер мен жастардың цифрлық сауаттылығын арттыруға, жасанды интеллектіні тиімді әрі саналы қолдануға бағытталған маңызды бастама деп есептеймін.
Қазақстан Республикасының Президенті Қасым-Жомарт Тоқаев өз Жолдауында жасанды интеллектіні дамыту мәселесіне ерекше тоқталып, оны еліміздің стратегиялық даму бағыттарының бірі ретінде атап өтті. Бұл бастама білім беру жүйесіне де үлкен жауапкершілік жүктейді. Өйткені бүгінгі студент – ертеңгі бәсекеге қабілетті маман. Сондықтан жоғары оқу орындарының басты міндеттерінің бірі – жастарды заманауи технологияларды дұрыс қолдануға үйрету.
І. Жансүгіров атындағы Жетісу университеті де бұл бағыттағы жұмыстарды жүйелі түрде қолдап келеді. Университетімізде студенттердің ғылыми-зерттеу жұмыстарына, цифрлық технологияларды меңгеруіне және шығармашылық жобаларды жүзеге асыруына ерекше көңіл бөлінеді. Бүгінде білім алушылар жасанды интеллект құралдарын ғылыми ақпараттарды іздеуде, мәтіндерді өңдеуде, визуалды контент әзірлеуде, бейнематериалдар дайындауда және жаңа идеяларды жүзеге асыруда тиімді пайдаланып жүр.
AI SANA аясында ұйымдастырылған «AI SANA Жетісу университеті студенттерінің көзқарасымен» атты конкурс та студенттердің шығармашылық әлеуетін арттыруға бағытталған маңызды жобалардың бірі болды. Аталған байқау жастардың жасанды интеллектке деген көзқарасын, оны оқу мен күнделікті өмірде қолдану тәжірибесін шығармашылық форматта көрсетуге мүмкіндік берді. Студенттердің бейнежобалары мен креативті жұмыстары олардың жаңа технологияларға қызығушылығы жоғары екенін және цифрлық ортаға бейімделіп келе жатқанын көрсетті.
Жасанды интеллект – болашақтың технологиясы. Алайда оны дұрыс әрі жауапкершілікпен қолдану аса маңызды. ЖИ студенттің орнын алмастырмайды, керісінше оның ойлау қабілетін дамытып, ғылыми және шығармашылық ізденістеріне жаңа мүмкіндік береді. Осы тұрғыда AI SANA жобасының басты мақсаты – жастарды технологияны саналы пайдалануға тәрбиелеу деп ойлаймын.
Бүгінде ғылым, білім, журналистика, медиа және басқа да көптеген салалар цифрлық трансформация кезеңін бастан өткеруде. Сондықтан заманауи маман тек кәсіби біліммен ғана шектелмей, цифрлық технологияларды еркін меңгеруі қажет. Бұл – уақыт талабы.
Қорытындылай келе, AI SANA – жастардың цифрлық мәдениетін қалыптастыратын, олардың ғылыми және шығармашылық әлеуетін арттыруға ықпал ететін маңызды жоба. OpenAI бас директоры Сэм Альтман айтқандай: «Жасанды интеллект адамзаттың ең қуатты құралына айналуы мүмкін» Сондықтан бүгінгі жастардың жаңа технологияларды меңгеруі – ел болашағы үшін маңызды қадам.
Гүлдана Тұрабай
І. Жансүгіров атындағы Жетісу университеті,
Гуманитарлық факультет деканының ғылыми жұмыс жөніндегі орынбасары,
шетел тілдері және аударма ісі кафедрасының оқытушы-дәріскері
