Астанада Мәдениет және өнер қызметкерлері күніне орай өткен «Мәдениет және инновация» республикалық форумы мәдениет саласындағы өзекті мәселелер мен заманауи үрдістерді талқылайтын алаңға айналды. Еліміздің 20 өңірінен келген 600-ден астам мәдениет қызметкері бас қосқан жиында цифрлық трансформация, кітапхана және архив ісін жаңғырту, сахна технологияларын дамыту мәселелері кеңінен қаралды, – деп хабарлайды 7-su.kz ақпараттық порталы.
Форумға халықаралық компания өкілдері, индустрия сарапшылары, сценография және визуал технологиялар мамандары қатысты. Екі күнге созылған іс-шараның негізгі мақсаты – мәдениет саласындағы тәжірибе алмасуды күшейтіп, инновациялық шешімдерді енгізу жолдарын талқылау.
Форумның екінші күні білім беру секцияларына, тәжірибелік сабақтар мен кәсіби пікірталастарға арналды. Қатысушылар кітапхана ісін дамыту, архив қорларын цифрландыру, мәдени мекемелерді басқарудың жаңа тәсілдері және театр-концерт индустриясындағы технологиялық жаңалықтарды ортаға салды.
Кітапхана саласына арналған секцияда құқықтық реттеу мәселелері, заңнамадағы өзгерістер және кітапханалардың заманауи мәдени-ағартушылық орталық ретіндегі рөлі сөз болды. Сондай-ақ халықаралық тәжірибелер мен қосымша қаржыландыру тетіктері таныстырылды. Аталған алаңға 130-дан астам кітапханашы қатысты.
Архив ісіне арналған бағытта архив материалдарын креативті индустрияда пайдалану, цифрлық жобаларды дамыту және саланы жаңғырту мәселелері көтерілді. Мамандар «Е-Архив» жүйесінің мүмкіндіктеріне ерекше тоқталып, құжаттарды сақтаудың және қолжетімділікті арттырудың жаңа тәсілдерін қарастырды.
«Қазақконцерт» базасында ұйымдастырылған «Театр өнері және концерттік қызмет» секциясында заманауи сценография, жарық және дыбыс технологиялары, мультимедиялық шешімдерге қатысты шеберлік сабақтары өтті. Қатысушылар сахналық проекция, цифрлық дыбыс өңдеу, аудиоинсталляциялар мен жарық жүйелерін басқарудың жаңа үлгілерімен танысты.
Тәжірибелік бөлім барысында мамандар кәсіби сахналық жабдықтардың соңғы нұсқаларын қолданып көру мүмкіндігіне ие болды. Сонымен бірге халықаралық кәсіби қауымдастық өкілдерімен тәжірибе алмасып, театр-концерт саласындағы жаңа трендтерді ортаға салды.
Форум қорытындысында қатысушылар мәдениет саласын дамытуға бағытталған жобалық ұсыныстарын ұсынып, өзара ынтымақтастықты күшейту мәселелерін көтерді. Іс-шара соңында форумға қатысқан мамандарға арнайы сертификаттар табысталды.
