Текелі қаласында жергілікті тұрғын үй қорын сақтау және көпқабатты баспаналардың техникалық жағдайын жақсарту мақсатында шатырларды күрделі жөндеуден өткізу шаралары сәтті жалғасуда. Бекітілген арнайы жоспарға сәйкес биыл шаһардағы 9 бірдей көпқабатты тұрғын үйдің ескірген шатыр жабындарын толықтай жаңарту көзделіп отыр, – деп хабарлайды 7-su.kz ақпараттық порталы.
25 сәуірде басталған ауқымды күрделі жөндеу жұмыстарын жауапты мердігер Темірқазық стройпроект серіктестігі сапалы жүргізуде. Бүгінгі таңда белгіленген жоспардағы 4 көпқабатты тұрғын үйдің шатырын қалпына келтіру жұмыстары аяқталуға жақындап қалды.
Атап айтқанда Әл-Фараби көшесіндегі 21 үйдің, Тәуелсіздік көшесіндегі 5 үйдің, сондай ақ Қазақстан көшесінде орналасқан 26 және 28 үйлердің бірінші блогының жоғарғы шатырлары толықтай жаңартылып жатыр. Құрылыс барысында көп жылдар бойы тозығы жеткен ескі шатыр жабындары толық алынып тасталып, конструкцияның беріктігі мен қауіпсіздігі барынша ескеріле отырып, заманауи жаңа сапалы құрылыс материалдары қолданылуда.
Бұл маңызды жұмыстар қаладағы тұрғын үй қорын ұзақ жылдар бойы апатсыз сақтау мақсатында кезең кезеңімен жүйелі түрде жүзеге асырылады.
