Синоптиктердің мәліметінше, 29 мамырда Қазақстанның басым бөлігінде ауа райы құбылмалы болады. Кей өңірлерде жаңбыр жауып, найзағай ойнайды, нөсер, бұршақ және дауыл болады. Республика аумағында жел де күшейеді, – деп хабарлайды 7-su.kz ақпараттық порталы.
Ірі қалалардағы ауа райы
Астана – жауын-шашынсыз. Батыстан, оңтүстік-батыстан соғатын желдің жылдамдығы 9-14 м/с, күндіз екпіні 15–18 м/с-қа дейін жетеді. Ауа температурасы түнде +10…+12°C, күндіз +26…+28°C.
Алматы – күндіз қысқа мерзімді жаңбыр жауып, найзағай ойнайды. Желдің жылдамдығы 3–8 м/с, екпіні 13 м/с-қа дейін күшейеді. Температура түнде +13…+15°C, күндіз +27…+29°C.
Шымкент – жауын-шашынсыз. Шығыстан соғатын жел 8–13 м/с. Температура түнде +13…+15°C, күндіз +30…+32°C.
Жетісу облысы
Түнде таулы аудандарда аздаған жаңбыр жауады. Облыстың оңтүстігі мен шығысында, таулы өңірлерде найзағай ойнайды. Солтүстік-шығыстан соғатын жел 9–14 м/с, кей жерлерде екпіні 15-20 м/с болады.
Талдықорған – жауын-шашынсыз. Желдің жылдамдығы 5-10 м/с. Температура түнде +11…+13°C, күндіз +25…+27°C.
Қауіпті ауа райы болатын өңірлер
Атырау облысында жаңбыр жауып, найзағай ойнайды. Күндіз кей аудандарда нөсер жаңбыр, бұршақ және дауыл болады.
Маңғыстау облысында жаңбырмен қатар шаңды дауыл болады. Желдің екпіні 17-22 м/с-қа дейін жетеді.
Қостанай облысында күндіз облыстың батысында найзағаймен бірге бұршақ жауып, дауыл соғады.
Солтүстік Қазақстан облысында бұршақ жауып, дауыл тұрады. Кей жерлерде желдің екпіні 23-28 м/с-қа дейін күшейеді.
Павлодар, Шығыс Қазақстан және Абай облыстарында жаңбыр жауып, найзағай ойнайды, бұршақ түсіп, дауыл соғады.
Жауын-шашынсыз өңірлер
Түркістан, Ұлытау және Қызылорда облыстарында жауын-шашын болмайды. Алайда Қызылорда облысының кей аудандарында шаңды дауыл тұрады.
Ең жоғары ауа температурасы Түркістан, Қызылорда және Маңғыстау облыстарында тіркеледі. Күндіз ауа температурасы +32…+37°C-қа дейін көтеріледі.
Синоптиктер тұрғындарға ауа райының күрт өзгеруіне байланысты сақтық шараларын сақтап, дауылды ескертулерге назар аударуға кеңес береді.
